Den cuadro di Dia Internacional di Mucha, Pasa Pret cu Rotaract a celebra su di 9 edicion cu wega y actividadnan dibertido cual un bes mas a haci hopi mucha contento y trece varios famia hunto pa un dushi dia di actividad. E aña aki cu celebracion di Pasa Pret cu Rotaract a bay tremendo y mas miho cu tabata spera. Pasa Pret cu Rotaract e aña aki a yega na un promedio di 300 mucha of mas cu a participa na e evento sin conta nan famia cu a compaña nan. Rotaract Club of Aruba ta un club hopi fuerte cu a conta cu boluntarionan regular di nan Club, y como tambe boluntario extra pa e evento aki.
Entre e diferente actividadnan tabatin manera e huki di arte y pintamento di cara, careda di douw, careda cu cuchara, street bowling, wega di baseball, wega di basketball, photo booth, bulamento den saco y hopi mas. E atardi aki tabatin un programa di entretenimento unda e miembronan di e club, Roslaine Everon y DJ Kash a haci e parti di animacion. E popular gruponan di baile, esta Pierewietje y C-Pop Kidz a haci un bunita show. Tambe Elite K9 Club a duna un presentacion pa e muchanan y tambe Metabolic Foundation cu weganan innovativo.
Un bunita trabou di decoracion a ser haci pa Ashanti Eustacia di D&D Events, cu a trece e ambiente di mucha den Pasa Pret cu Rotaract.
E proyecto aki ta esencial pa Rotaract organisa pasobra no ta tur mucha tin e posibilidad di bay un actividad tur ora y paga p’e. Esaki ta un evento na alcance di tur mucha, un evento cu entrada cu actividadnan gratis, nan ta haya un paspoort pa hunga tur wega gratis y un regalito na final. Rotaract y su sponsornan ta kere cu e miho inversion cu bo por haci semper ta den nos muchanan, pasobra nan ta e futuro di mayan. Pues pa Rotaract, pa e muchanan tin e derecho di tempo liber ta un di e derechonan den International Declaration of The Rights of Children UN.
