E dia di amor y amistad celebra 14 di februari ta na honor di San Valentin, un dokter cu a converti den pastor den siglo III na Roma, pa casa e soldadnan romano clandestinamente di e emperador Marco Aurelio door e tabata considera cu e solteronan tabata combati miho riba campo di bataya. E edicion di Focus Digital Magazine di februari ta resalta e tema di amor contando desde e encuentro te na celebracion matrimonial di dos pareha, cu cada uno tin un bunita storia.
MICHAELAIN Y GILNER
Riba e portada di Focus Digital Magazine ta ilustra e pareha Michaelain y Gilner Dirksen, cu a topa otro pa prome biaha alrededor di 22 pa 24 aña pasa tempo cu nan tabata forma parti di un agrupacion musical. E siguiente encuentro tabata 10 aña pasa y e atraccion tabata mutuamente y nan a cuminsa ‘date’ compartiendo momentonan bunita. Como pareha nan caracter ta match perfecto y nan tin gustonan casi igual y tin mesun vision pa loke ta trata nan logronan personal.
E plan inicial di Gilner Dirksen y Michaelain Trimon tabata pa celebra nan enlace matrimonial na 2020, pero debi na e pandemia nan a schuif nan bruid pa 2022. Na inicio di aña nan a bay Censo pa cuminsa scoge e fecha, cual a bira pa e ceremonia civil dia 22 december y riba e dia siguiente e bendicion na misa, sigui pa e gran celebracion. Importante pa ambos tabata pa por disfruta di cada momento di nan celebracion matrimonial.
SHARLEEN & MIGUEL
Un encuentro divino a surgi na iglesia HBN unda Miguel Rodrigues-Capelo y Sharleen Tromp ta congregando. Nan a wak otro despues di hopi aña y na december 2021 nan a cuminsa combersa. Locual a atrae Sharleen for di prome instante di Miguel ta cu e tin mesun creencia cu ne y ta un homber cu ta provee pa su cas, cu tin ambicion, balente, cu vision y metanan stipula. Di parti Miguel locual a atrae di Sharleen ta su personalidad, humildad, honestidad, pasion pa Cristo, beyesa natural, anhelo di e muher virtuoso, confiansa y confidencia den su mes.
E momento cu nan a haci e pregunta: “E persona aki ta esun planea pa mi”?… tabata despues di nan prome encuentro y algun luna compartiendo cu otro. Na varios ocasion nan a refleha riba loke ta e deseonan di nan curason y a ricibi conviccion, cu nan ta ‘un regalo pa otro’. Ambos tin varios cos en comun sinembargo nan tin hopi ingrediente cu ta complementa otro tambe. Miguel y Sharleen ta comparti ademas di e detayenan di nan amor tambe potretnan bunita di nan celebracion matrimonial.
Lesa e interesante entrevistanan cu ta resalta e topico di amor den edicion di februari, cu ta accesibel via Apple iStore, Android Google Play Store y www.focus.aw (Menu Tab FOCUS DIGITAL)
