https://static.ezine-cdn.com/magazines/302/pub/frame.html
E luna di maart pa revista FOCUS semper tin su toke special door cu ta pone un luz extra special riba e damanan en conexion cu Dia Internacional di Hende Muhe. Riba e portada ta ilustra Valentina Sánchez, Universal Woman 2023, cu a traves di su plataforma ‘Hacer visible lo invisible’, ta yuda e personanan cu ta sufri di depresion. Valentina a experiencia un tragedia famililar tempo cu e tabatin 15 y 16 aña di edad, cu e suicidio di su mama y su wela.
Tin un Arubiano cu ta trahando como un Senior Corporate Controller na Amcor, e compania multinacional mas grandi na Suisa, cu ta produci pakete pa diferente sector manera cuminda, medicina y tabaco. Si lo a puntra Jennifer Lopez tempo e tabata studiando na cua pais e lo kier bay traha, riba su lista e no tabatin Suisa niun momento, pero e ta bisa ‘by luck of chance’ el a yega eynan.
Un proyecto di Anika Stevens basa riba ofrece ayudo mientras tabata bende artesania di e comunidad indigena na Ecuador, tabata e inicio di loke awendia ta su marca FAIR BLVD. Despues di a gradua cu un Master Degree den Luxury Management, Anika a dicidi pa combina luho y impacto social. Locual e ta disfruta mas di tin su propio negoshi ta cu e tin e libertad pa crea, explora y crece.
E ta un orguyo pa Chastity Kock-Hodge como directora di Chaz Modeling & Talent School pa wak Tanique Chan, un mucha muhe special cu a cuminsa cu e agencia 7 aña pasa, ta logra desfila den New York Fashion Week. Chastity ta bisa cu e mes nunca a haya ningun enseñanza of guia pa coach e muchanan special, pero el a tume manera un challenge pa su mes y ta hacie cu hopi amor y cariño.
E luna di maart tin un fecha di celebracion grandi pa Aruba, Dia di Himno y Bandera dia 18 di maart. E pintor impresionista, Elvis Tromp, ta destaca pa su obranan excepcional uzando principalmente e temanan di Aruba manera flora, fauna, paisahe, cas, edificio y monumento. Su meta como artista ta pa purba inspira nos hendenan a traves di arte, pa aprecia nos cultura y nos custumbernan.
Focus Digital Magazine ta accesibel gratis a traves di Apple iStore, Android Google Play Store y www.focus.aw (Menu Tab FOCUS DIGITAL). Den edicion di maart por lesa mas di e entrevistanan menciona y hopi otro mas topico hopi interesante!
