Despues di dos aña cu Angele a sali den edicion di Focus Digital Magazine ofreciendo su coleccion Piña inspira riba Aruba, awo su tienda na South Beach Mall ta un realidad. Esaki ta prueba bibo cu su acesorionan ta conta cu e respaldo di clientenan leal, cu ta gusta su piezanan unico. Cu e habrimento di e negoshi aki, Angele ta lansando un coleccion nobo tambe cu no solamente lo keda enfoca riba su clientenan existente, pero tambe ta brinda nos bishitantenan e oportunidad pa hiba algo di Aruba bek nan pais.
Angele ta lansando e coleccion di Virgen di Alto Vista, cu ta duna enfasis riba e creencia di nos hendenan y alabes ta sirbi como un bunita recuerdo pa nos bishitantenan hiba di Aruba. Angele semper a encanta tur loke ta e mundo joya y acesorio, p’esey no ta nada straño cu su pasion a sigui crece y a desaroya di tal forma, cu el a bin cu e idea pa lansa su propio diseño. El a haya e inspiracion durante e pandemia, unda el a para keto y realisa con hopi e ta stima y aprecia su dushi isla Aruba. Na mesun tempo e kier a contribui na e mercado comercial y di e forma aki aporta na e desaroyo economico di su pais. Tur esaki ta bay man den man cu e ideanan, creatividad y habilidad pa presenta un liña di joya, cu ta identifica nos dushi Aruba.
E materialnan cu Angele ta uza pa crea su liña di acesorio ta uno hopi duradero, si aplica e cuido adecuado. E proceso creativo cu for di un idea esaki ta bira realidad, ta pa Angele un satisfaccion enorme. Tur e piezanan tin un accento Arubiano, cu ta pone bo identifica bo mes como un persona cu tin un amor y aprecio grandi pa nos dushi Aruba.
