Florence Lesage no por a warda pa bin y conoce e ekipo di Aruba Marriott Resort. E tabata excita pa descubri e specialidadnan local. El a presenta un variedad di delicatesse cu durante añanan el a bini na perfecciona na e evento di 3 dia di “Afternoon Tea” conhuntamente cu Aruba Marriott Resort. E tabatin tambe e oportunidad pa guia un Masterclass pa e studiantenan di EPI den rango culinario. E tabata un experiencia unico pa por inspira y comparti conocimento den e area aki na Aruba.
E inspiracion di Florence Lesage pa scoge e profesion di Pastry Chef a bini di su mayornan y su wela. Yena cu encanto, Florence tabata mira su mama y tata traha e pasabocanan di mas dushi den cushina, como tambe e cumindanan yena di sabor. Loke ta keda graba como e recuerdo di mas bunita ta e bolonan di su kerida wela. E idea pa crea pasteleria artesanal tabata e trabou di su soño y ta hopi feliz di a sigui su pasion y bira un Pastry Chef.
Florence tin su Brevet de Maîtrise, cu ta un Master’s Degree in Pastry. El a participa den varios competencia y na aña 2015, el a participa na WorldSkills na Sao Paulo, Brasil, unda el a gana e titulo di Vice World Champion Junior. Na 2022, Florence a gana den colaboracion cu Alexis Beaufils, un pastry chef Frances, e MONDIAL DES ARTS SUCRES, e campeonato mundial di e arte di sucu.
Cu su training den pastry clasico, cual ta inclui cos dushi, chuculati, bolo y ijscream, a hib’e na crea e piezanan artistico di sucu. Den Focus Digital Magazine di e luna aki tin un entrevista cu Florence Lesage, unda e ta comparti detayenan interesante. E revista ta accesibel gratis a traves di Apple iStore, Android Google Play Store y www.focus.aw (Menu Tab FOCUS DIGITAL).
