Den e ultimo añanan, azeta di coco a converti den un ingrediente protagonista di e productonan den e rutina di beyesa, pero e ta funciona realmente? Aki tin e contesta… Semper nos ta scucha bon comentario tocante azeta di coco y e rason pakico el a bira asina popular ta, pasobra e tin hopi funcion. Ademas di por uze den receta di cuminda, e por wordo inclui tambe den bo rutina di skincare. Aunke hopi hende ta bisa cu azeta di coco por yuda bo cabey crece, e realidad ta cu no tin prueba cu ta demostra esaki. Sinembargo algo cu si ta berdad, e tin hopi beneficio pa bo cuero, principalmente pa su ingredientenan anti-inflamacion y hidratante.
No tin duda cu azeta di coco ta un aliado grandi pa hidrata e cuero di bo curpa, pero tambe e ta nutri bo cuero cu vitamina y ta dun’e un briyo sin igual, cual ta complementa un bon suntan ora bo a caba di bin fo’i lama. Incluso, su ingredientenan hidratante ta yuda disminui plooi y e efectonan di biehes. Aunke claro, ta importante pa menciona cu esaki no ta trata di smeer e azeta riba bo cara, sino di haya e productonan adecuado cu tin e ingrediente aki, y cu a pasa den un laboratorio, cu ta sigura cu loke bo ta aplicando riba bo cuero ta bon.
E uzo di azeta di coco no ta limita na un tipo di cuero so, ta p’esey esaki ta un ingrediente cu ta inclui den un cantidad di producto di skincare, manera serum y hidratante. Incluso, e expertonan ta bisa cu e caracteristicanan cu e ta posee combina cu otro hidratante, por ta un ‘super boost’ pa bo cutis. Incluyendo ingrediente nobo den bo rutina di beyesa, por ta un poco riscante, ya cu tin chens cu e por ocasiona iritacion, p’esey semper ta mas recomendabel pa bay cerca un dermatologo.
E palmanan di coco ta un di esnan mas util na mundo y hopi biaha ta ser reconoci como ‘tree of life’. E ta proporciona alimento, combustibel, cosmetico, medicina popular y material di construccion, entre su cantidad di uzo. Na e paisnan tropical pa hopi aña, a cosecha coco, y un gran cantidad di persona ta depende di esaki pa nan biba. E motibo ta cu tur e partinan di e palma di coco tin un balor halto, tanto nutricional como economico.
