Dos biaha pa aña e famia real ta saca tempo for di nan agenda druk pa saca potret den un sesion oficial. Rey Willem-Alexander, Reina Máxima, Prinses van Oranje, Prinses Alexia y Prinses Ariane a pose pa e sesion di potret pa zomer e biaha aki na Zuiderstrand na Den Haag.
E sesion di potret anual ta mas tempran e aña aki door cu tradicionalmente e famia real ta saca potret na final di e vakantie di zomer. Door di estudionan den exterior di e dos prinsesnan mas jong, Alexia y Ariane, nan no por ta presente. P’esey Rijksvoorlichtingsdienst a opta pa adelanta e sesion di potret na comienso di zomer.
Rey Willem-Alexander, Reina Máxima y e prinsesnan Amalia, Alexia y Ariane a desafia e biento pa un sesion di foto cu un look casual na e beach bar La Cantina na Zuiderstrand.
E realesa a opta pa bisti den colornan di zomer cu hopi blanco y licht blauw. Por ehempel Reina Máxima a bisti un crop top blanco cu un saya maxi di Tory Burch. Loke a resalta di su look ta e hairpin grandi cual el a wanta su cabey for di su cara. Rey Willem-Alexander tambe a bisti na blanco cu un jacket cu cuadra licht blauw.
Prinses van Oranje a opta pa un toke di color cu un blazer geel suave riba un top blanco y jeans licht. Prinses Alexia a bay pa un look mas rustig cu un tank top blanco y un carson licht blauw, pero el a uza renchinan oro grandi den forma di curason di e marca Choices by Babs. E prinses mas jong, Ariane, a luci un blusa berde scur di Ba&sh cu el a combina cu jeans blanco hancho.
📷 robin utrecht
