E ta un strea cu a sali briya diripiente cu su luz captando tur admiracion cu su fabuloso diseñonan. Andrew Steba ta kere firmemente den e poder di manifestacion, paso for di chikito e tabata su soño pa un dia e yega na diseña pa e reinanan di beyesa. El a medita hopi riba su soño y a kere fuertemente cu e ta bay logra esaki. E oportunidad a yega creando e trahenan pa e show di apertura di Miss Teen Aruba International 2023 y tambe pa Meet & Greet di Miss Universe Aruba 2023.
Andrew ta considera su mes como ‘self taught’ door cu tur e conocemento y habilidadnan cu e tin den confeccion y diseño di moda, el a adkeri a base di ‘trial and error’ y tambe hopi ora tras di mashin di cose. Su introduccion den e mundo di moda a cuminsa oficialmente desde cu el a participa na e curso di fashion design di Ateliers’89, unda e mester a presenta un coleccion di 10 looks. Despues di eynan el a sigui practica door di wak tutorial riba youtube y door di lesa varios buki, cu ta splica e diferente tecnicanan di costura y diseño.
Cu cada prenda diseña y confecciona su conocemento ta bira mas rico y esaki ta motiva Andrew Steba inmensamente. Semper lo tin tecnicanan nobo pa siña y semper tin espacio pa innova y mehora. Conoce un poco mas di e hoben diseñador aki y kico ta e metanan cu e kier mira realisa den e proximo 5 añanan den Focus Digital Magazine di augustus, cu ta accesibel gratis a traves di Apple iStore, Android Google Play Store y www.focus.aw (Menu Tab FOCUS DIGITAL).
