Aña pasa november Meliza Lopez a participa den un competencia di fotografia organisa pa Fundacion Parke Nacional Aruba (FPNA) den colaboracion cu Post Aruba NV, cual riba dia 27 september nan a revela e ganadornan. E tema tabata e flornan nativo di Aruba y durante varios siman, Meliza su wowonan constantemente tabata en buska di e flornan cu ta crece tur caminda na Aruba. Durante e periodo di e competencia el a captura hopi flor cu nunca el a yega di wak. Esnan cu el a captura tabata e flornan cu el a haya di mas bunita t’e flornan di mas chikito.
E tipo di fotografia aki yama ‘macro-photography’ y riba e tipo di potret nan aki bo ta mira e detayenan cu normalmente nos no ta mira. E potret cu Meliza Lopez a gana e prome luga den categoria ‘Profesional’ ta un flor sumamente chikito, cu mayoria di nos tin den nos cura! E nomber oficial di e flor aki ta ‘Boerhavia Coccinea’. Meliza cu ta encanta explora e naturalesa ta haya cu nos tin hopi bunitesa na Aruba, mucho mas cu nos ta consciente di dje.
Meliza su tata semper a gusta saca potret y ta esun cu a planta e simia di fotografia cerca dje. Semper ora nan tabata bay vakantie, e tabata zorg cu Meliza y su ruman mes tin un camera cu nan por uza. Despues cu el gradua como psycholoog y a cuminsa traha, el a cumpra un camera mas sofistica. Durante e añanan despues el a siña con pa saca potret riba ‘manual’ y esey a haci e hobby mas dushi ainda, paso door di saca riba manual e por haya hopi mas control riba e potret cu ta wordo saca.
Meliza gusta bay band’i costa pa disfruta henter e experiencia for di tende e parhanan, e olanan, e holo di lama y sinti e biento. E ta encanta e colornan ora solo ta bahando y con nan ta cambia, con nan ta refleha den e awa. Meliza den post processing ta purba di crea e feeling cu el a experiencia na e momento cu e tabata eynan… Esey nunca ta sosode 100% pero Meliza ta purba yega cerca. Su camera ta su herment pa captura e informacion, su post processing ta unda e resto di su creatividad ta haya espacio pa visualisacion final di e imagen.
E tipo di potretnan preferi di Meliza ta land- and seascape, long-exposure, macro, y night-photography y practicamente semper e imagennan ta di naturalesa. Actualmente e ta uza un Canon 7D Mark II y e tin varios lens cu e ta uza pa e diferente tipo di potretnan. Si bo mira Meliza band’i caminda cu su camera, e chens ta grandi cu bo lo wak’e ta den tera, drumi abou, cu focus completamente riba loke e ta haciendo y bo por ta sigur manera e ta bisa: “Having the time of my life… 😊”. Pa Meliza Lopez fotografia ta un manera hopi dushi pa relax, recharge, reconnect y wordo inspira.
