DICON E HENDENAN TA MALTRATA E ANIMALNAN? E SICOLOGIA DI UN CONDUCTA …

E maltrato di animal cu tambe ta conoci internacionalmente como ‘violence against animals’ (VAA) ta un problema grave na nivel mundial. E ta existi riba tur nivel socioeconomico y cultura. E causa tras di maltrato di animal ta complica y multifacetico, y a lo largo di añanan a trece dilanti varios teoria. Locual a ser descubri ta un gama amplio di factor social manera normanan cultural y status economico cu ta asocia cu maltrato di animal. Varios estudio demografico a demostra cu e hendenan cu ta bin for di un ambiente socioeconomico abou tin mas probabilidad di comete maltrato contra animal cu esunnan di un nivel mas halto. 

Ademas a ser descubri cu e hendenan cu ta biba den areanan rural of e luganan aisla tin mas probabilidad di abusa di e animalnan cu esunnan cu ta biba den zonanan urbano of cerca di otro hende. E maltrato di animal ta un forma di comportamento abusivo exhibi door di e hendenan contra e animalnan. E abusadonan por maltrata of mata un animal pa diferente motibo, incluyendo placer, buskeda di emocionnan fuerte, anger management, alivio di stress of incluso pa simpel curiosidad. E articulo aki ta explora e psicologia di Maltrato contra Animal (VAA) a traves di diferente causa y consecuencia, cu ta conduci na e patron destructivo den e relacionnan entre humano y animal.

E CAUSANAN DI MALTRATO DI ANIMAL

1.  Falta de empatia: E hendenan cu ta abusa di e animalnan ta carece di empatia y comprension di e dolor y sufrimento di otro sernan bibo. Kisas nan no por compronde cu nan accionnan por causa dañonan grave of hasta morto na otro ser.  

2. Deseo di poder: E abusadonan di e animalnan hopi biaha ta sinti e necesidad di demostra nan poder riba e criaturanan mas debil, hayando un placer perverso den domina y controla nan.

3. Problema di salud mental: Den algun caso, e problemanan di salud mental manera depresion of ansiedad, por hiba un persona na descarga su rabia y frustracion riba e animalnan.

4. Influencia Cultural: Den algun cultura, violencia contra e animalnan ta ser mira como acceptabel of incluso comun, pues esunnan cu a lanta rondona pa e tipo di comportacion aki kisas no ta pensa dos biaha prome di abusa di e animalnan. 

5. Criansa Deficiente: E falta di guia adecuado di e mayornan y pone limitenan por conduci tambe na un persona cu ta maltrata animal. E muchanan cu no siña nan pa aprecia y respeta e bida di otro criaturanan por crece pensando cu ta okay pa baha nan rabia riba nan.  

6. Abuso di Sustancianan: E personanan cu ta bou influencia di droga of alcohol por tin mas probabilidad pa maltrata animal door cu nan sano huicio ta afecta y ta posibel cu nan no ta consciente di e consecuencianan.

7. Ganashi: Den algun caso, e hendenan por abusa di animal pa obtene ganashi manera den algun caso pa comercialisa ‘dog breeding’ of cu e partinan di animal illegalmente.

8. Entretenimento: Algun hende ta maltrata e animalnan pa entretene nan mes manera organisando e peleanan di gai, cacho of ‘corrida de toros’.

9. Ignorancia: Ta posibel cu algun abusado simplemente no ta compronde e consecuencianan di nan accionnan of no sa miho door di falta di educacion di e bienestar y e derechonan di e animalnan. Cualkier sea e rason, nunca hamas ta okay pa maltrata e animalnan, y esunnan cu ta haci esaki mester para responsabel pa nan actonan. E animalnan ta depende di nos pa cuida y proteha nan di cualkier daño, p’esey ta nos responsabilidad pa sigura di trata nan cu respet y compasion. Si bo ta testigo di maltrato di animal no keda keto, pero raporta esaki na autoridad inmediatamente!