Radisson Blu Aruba a anuncia cu hopi emocion cu nan a ricibi e prestigioso premio “Best of Choice” 2024 di Choice Hotels International, Inc. (NYSE: CHH), un compania lider mundialmente den hoteleria.
E reconocimento di gran balor aki ta destaca e dedicacion excepcional na e satisfaccion di e huespednan y e servicio superior cu e hotel a demostra constantemente desde su apertura tres aña pasa.
Entre mas di 6.500 propietario y ehecutivo di hotel, e Gerente General di e resort, Luigi Wix y Directora Comercial, Shareska Gutiérrez, a biaha pa Las Vegas pa ricibi e premio, unda nan a disfruta di un ceremonia inolvidabel. E reconocimento “Best of Choice” ta e premio mas halto dentro di Choice Hotels, otorga na e top hotelnan den e portfolio nacional y internacional di e compania, loke ta representa un gran logro.
Como un di e propiedadnan di prome nivel cu ta opera bou e bandera di Radisson Blu, e hotel a demostra un enfoke excepcional den e satisfaccion di e huespednan y dedicacion na un servicio superior. E criteria pa ricibi e reconocimento ta wordo evalua a traves di Choice Hotels su rapport oficial di clasificacion di propiedadnan.
Desde cu nan a habri tres aña pasa, Radisson Blu Aruba a converti rapidamente den un destino stima pa e biaheronan cu ta en busca di e luho moderno, relahacion y servicio autentico. Dirigi pa un ekipo dedica di liderazgo totalmente local, e resort a gana e reputacion di ofrece experiencianan inolvidabel cu ta mustra e beyesa y encanto di Aruba.
Luigi Wix, General Manager di Radisson Blu Aruba, a expresa su gratitud pa e premio y el a bisa: “Nos ta berdaderamente honra di ricibi e premio ‘Best of Choice’ 2024, specialmente cu nos ta celebra nos tercer aniversario. E reconocimento aki ta un testimonio di e trabou duro y e dedicacion di henter nos team, cu constantemente ta haci nan esfuerso pa brinda na nos huespednan experiencianan inolvidabel na nos One Happy Island”.
Shareska Gutiérrez, Directora Comercial, di Radisson Blu Aruba a splica cu e hotel ta sobresali den ofrece un experiencia di un ‘design hotel’ cu ta brinda su huespednan un feeling di ‘boutique’ y exclusivo, enfocando riba calidad y servicio personalisa. E hotel ta ricibi scorenan halto den e puntuacionnan y reviews di e huespednan na fin di nan estadia, specialmente e area di staff, cambernan sumamente espacioso como tambe e hotel su condicion y amenidad cu nan ta ofrece.
Den Focus Digital Magazine di juni, Shareska Gutiérrez ta conta con Radisson Blu Aruba a enfrenta un di e retonan mas grandi, cual ta habri e hotel durante pandemia. E revista ta accesibel gratis via Apple iStore, Android Google Play Store y www.focus.aw (Menu Tab FOCUS DIGITAL).
Download bo revista awo!
