Aruba Airport Authority N.V. (AAA) tin e placer di comparti e rutanan nobo y e frecuencianan adicional di Delta Air Lines pa e siguiente temporada di winter, reenforsando su compromiso pa brinda e pasaheronan mas opcion di biahe.
![](https://focus.aw/wp-content/uploads/2024/06/ARTNPHOTOARUBA-19-j-1024x684.jpg)
Delta Air Lines ta anuncia “Largest-Ever Winter Latin Schedule”
Delta Air Lines ta ampliando su schedule pa winter cu diferente destinacion importante desde su hub na Minneapolis-St. Paul Airport (MSP). E aerolinea lo introduci vuelo directo un bes mas pa Aruba (AUA) cuminsando desde dia 20 di december 2024. E vuelonan directo pa Aruba lo ta riba diabierna y diadomingo desde MSP. Esaki ta marca e regreso di e ruta MSP-AUA, cu tabata den operacion pa ultimo biaha na aña 2018 cu un vuelo semanal riba diasabra. Cu e schedule nobo, Delta Air Lines lo amplia e cantidad di vuelo te cu dos vuelo semanal desde MSP, complementando e vuelonan semanal ofreci riba diasabra pa Sun Country. Pa luna di januari y februari, Sun Country lo aumenta e cantidad di frecuencia na tres vuelo semanal (diasabra, diadomingo y diaranson), esaki lo resultado na un cantidad di 5 vuelo pa siman combina entre MSP y AUA.
E winter schedule di Delta Air Lines pa e temporada di e aña aki lo inclui vuelo diario desde New York (JFK) y lo expande cu un vuelo mas pa siman desde 11 di januari 2025. E dobel operacion diario di Atlanta (ATL) lo cuminsa dia 19 di december 2024. Lo reinicia e vuelonan diario for di Boston (BOS) dia 19 di december 2024 y e dos vuelonan semanal di diabierna y diadomingo desde MSP lo inicia riba 20 di december 2024. E vuelonan adicional lo aumenta e cantidad di capacidad di asiento di 95.705 y 521 vuelo durante temporada di winter 2023-2024 pa 103,333 asiento y 553 vuelo den e siguiente temporada di winter. E aumento impresionante di 8% pa asiento y 6% di vuelo ta demostra Delta Air Lines su confiansa den Aruba como un destinacion den su red mundial.
![](https://focus.aw/wp-content/uploads/2024/06/ARTNPHOTOARUBA-Teasers-4-j-1024x684.jpg)
Jo-Anne Meaux Arends, Aviation Business Development Executive na Aruba Airport, a expresa su entusiasmo cu e regreso di ruta: “E regreso di e ruta MSP y e aumento di e frecuencianan di vuelo ta confirma e demanda halto y e boluntad di e aerolinea pa explora diferente gateway durante e temporada halto di winter, particularmente di esnan cu ta scapa di e friu y ta busca e calor di nos One Happy Island. E incorporacion di e ruta nobo di MSP cu Delta Air Lines ta extende y diversifica e mercado Norte Americano pa Aruba ainda mas, mehorando e conexion y acceso di un destinacion pa otro”.