Den e team di Muba Cosmetics cu ta consisti di 96 artista ta forma parti e aña aki, Roberto Avalo, cu lo bira e prome estilista den historia di Miss Universe procedente di Aruba. Muba Cosmestics cual ta e marca oficial di e certamen tabatin ya caba den su team Gionel Virginie di Corsou, ken ta un gran amigo y manera un ruman pa Roberto. E ta e persona ken a push’e pa tuma e reto grandi aki aña pasa den juli, unda Roberto a competi den un casting na Medellin hunto cu mas di 125 artista di rond mundo,
Roberto Avalo ta splica cu cualkier persona cu ta considera su mes make up artist y estilista tin e posibilidad pa participa. Sinembargo tur participante mester por pasa door di diferente filter pa logra wordo escogi. Roberto aña pasa a logra cay den top 6, pero no a clasifica den e top 3, pero e posibilidad a keda bati na su porta, pues 2024 tabata un posibilidad nobo. Roberto na april e aña aki a perde su tata, cu ta un di e pilarnan mas grandi den su bida. E tabata e mensahe cu su tata a manda p’e dia di e casting na Medellin, cu a dun’e curashi di bisa: “NOS TA BAY PE”.
Mil contratiempo pero na final di caminda tabata un recompensa memey di tanto dolor. Cu e logro di ta estilista oficial di Miss Universe, ta keda demostra cu Roberto ta un persona cu ta kere den su mes y nunca ta rindi apesar di e circunstancia. Den Focus Digital Magazine di e luna aki, Roberto ta enfatisa cu si ta posibel pa logra ta un miho version di bo mes despues di un tormenta cu a bati hopi duro. E revista ta accesibel gratis via Apple iStore, Android Google Play Store y www.focus.aw (Menu Tab FOCUS DIGITAL).
Download bo revista awo!
