Jennifer Lopez a bisti manera Queen Charlotte como e tema di e celebracion di su cumpleaño tabata Bridgerton. E strea di Hustlers a cumpli 55 aña diaranson 24 di juli, pero a celebra esaki sin presencia di su casa, Ben Affleck, durante fin di siman na Hamptons, Nueva York. Den un video comparti riba Instagram di e superstar, el a impresiona den un shimis blauw di gala elabora cu detayenan borda den oro, cu tabata briya den scuridad. El a completa su mahestuoso look cu handschoen blanco transparente, un coyar fini oro y el a luci su cabey color caramel den un ‘updo’ voluminoso.
E video tabata geset den musica di orkesta di e serie romantico y historico di Netflix y a mustra varios momento di e anochi special, incluyendo un koets cu cabaynan blanco cu a bin busca e artista. E tabatin su famia hunto cu ne y tambe su amigonan mas cercano, incluyendo su mama Guadalupe Rodríguez. Un potret di su yiu Max di 16 aña a ser saca hunto cu ne na mesa cu luz di bela. Aunke Ben Affleck tabata notablemente ausente memey di rumornan continuo di separacion entre e pareha, cu no ta sali hunto riba potret ya pa dos luna caba.
Un string quartet a duna Jennifer un serenata mientras e tabata sinta riba un trono y tabata e reina riba e pista di baile. Tur e invitadonan a luci trahenan igualmente elegante y mahestuoso di e era Regency. Den un momento di e anochi, a mira JLo cu e microfoon cantando y entreteniendo e multitud na su celebracion number 55. Mas laat durante e anochi ‘Jenny from the Block’ a bisti un impresionante shimis off-shoulder berde menta y detayenan di canchi oro. Riba su cabes e tabatin un adorno di cabey similar den oro. Despues e cumpleañera a supla e belanan di su bolo di cuatro piso.
Jennifer Lopez di mes tabata e centro di atencion di e fiesta mientras su amigonan a reuni rond di dje riba e pista di baile, hungando den un forma dibertido cu e capanan di twil di su shimis mientras e tabata baila, cual a keda capta den un video comparti por su amiga Elaine Goldsmith-Thomas. Su 251M siguido y fanatico tabata encanta cu e idea imaginativo di e fiesta di cumpleaño.
