Di acuerdo cu introduccion di GOL Airlines y expancion di e mercado Brasilero, a tene diferente reunionan clave na Brazil entre 22 di juli cu 25 di juli, 2024. E delegacion a consisti di Ronella Croes CEO di A.T.A., Jordan Schlipken Croes A.T.A. Area Director LATAM, Jo-Anne Meaux-Arends, Aviation Business Development Executive di AAA, y Carlos Barbosa di A.T.A. Brasil.
Pa e periodo actual (YTD) juni 2024, e mercado Brasilero a aumenta cu 33% compara cu e mesun periodo den 2023. Segun strategia di diversificacion y enfoke riba segmento di High Value, A.T.A. tin como meta pa aumenta e mercado Brasilero cu 40% den 2025 compara cu 2024. Loke ta trata e mercado general di Latino America, e meta ta pa amplifica e presencia di Aruba den paisnan di entre otro, Argentina, Brasil, Chile y Peru.
GOL Airlines lo hunga un papel crucial den logra e meta aki banda di conexionnan existente di Avianca cu vuelonan directo a traves di Bogota, Copa Airlines cu vuelo directo a traves di Panama, y LATAM Airlines cu vuelo directo via Lima.
Durante e siman, e delegacion a reuni cu esnan cu ta domina benta di biahe na Brazil. Mayoria ta socio existente y ta mira e potential pa expande e mercado. Esakinan a inclui CVC Corp, Agaxtur, Orinter, BeFly, Viagens, AbreuTur y Decolar. Tambe a reuni cu Aeropuerto di Guarulhos y cu COPA Airlines cu a tranporta 45% di esnan cu a bishita di Brazil na aña 2023. COPA, A.T.A. y AAA lo sigui traha di cerca cu otro pa expande e mercado.
Puntonan di atencion den e reunionnan aki a inclui: strategia, actualisacion di e producto Aruba, colaboracion na termino corto y largo y kico ta beneficioso pa e isla. Pa stimula e oportunidad di expande e mercado A.T.A. lo inverti mas den promocion general pa crea conscientisacion referente Aruba, lo inverti den e mercado conhuntamente cu GOL y lo traha mas di cerca cu esnan cu ta bende biahe den e mercado. Inversionnan den “advertising” lo subi mas cu 50% e aña aki compara cu 2023 y den aña 2025 compara cu 2023.
