BONAIRE TA BEK RIBA ESCENARIO DI MISS UNIVERSE DESPUES DI 25 AÑA

Un di e soñonan mas grandi na e momento aki di Ruby Paola Pouchet ta pa representa su pais dignamente y yega leu den e certamen di Miss Universe 2024 na Mexico. E meta aki ta hopi cerca di su curason y lo sigui traha duro pa haci esaki bira realidad. Ruby kier pa mundo mira con special su isla Boneiro ta y aunke chikito nan tin masha hopi pa ofrece nan bishitantenan. Desde nan cultura, naturalesa, paisahenan y mas cu tur cos nan hendenan cu ta e curason di Boneiro. E oportunidad di representa su isla cu e stima asina tanto como Miss Bonaire ta un honor inmenso

Desde cu Ruby Pouchet a wordo corona como Miss Bonaire 2023 su biahe tabata un experiencia di crecemento personal y desaroyo. E proceso aki a dun’e un perspectiva nobo, un oportunidad pa fortifica su proposito den bida y comparti esaki cu otro. Un di e cosnan mas bunita ta e privilegio di conecta cu diferente persona y instancia, participa den actividadnan di comunidad, y colabora cu organisacionnan cu ta traha pa un futuro miho pa Boneiro. Su biahe no solamente a fortalec’e como persona, sino tambe a amplia su compromiso pa sirbi su comunidad y inspira otronan.

Miss Universe ta e segundo certamen cu Ruby ta representando Bonaire y ta casi 1 aña caba, cu el a competi na Miss Grand International na Vietnam. E tabata un inspiracion pa Ruby di ta rondona di hende muhenan empodera cu metanan halto pa alcansa. Esaki ta un experiencia cu e lo no lubida nunca y awor e tin un amiga na cada rincon di mundo door di e certamen aki. Ruby Pouchet como Miss Bonaire a ricibi invitacion pa asisti como invitado special na certamen di beyesa na Curaçao, Colombia y Aruba.

Download bo revista awo!