E prome Miss Supranational Aruba, Rashida Schmidt, ta modelo y ta finalisando su Bachelor den Ley. Un mucha muhe di 22 aña cu ta describi su mes como un persona honesto, amabel y humilde. Un di su soñonan tabata pa competi den un certamen di beyesa y p’esey su participacion na Miss Supranational 2024, el a tuma cu man habri y realisando asina un di su soñonan. E ‘journey’ di Rashida desde 31 di maart cu el a keda corona como Miss Supranational Aruba pa 6 di juli cu el a competi na Polonia, tabata un experencia UNICO.
E ta corda bon con e tabata sinti e anochi cu el a wordo corona. Un sintimento straño door cu nunca el a participa den un certamen di beyesa, pero si e tabata un soño di dje semper. El a dicidi di pone tur miedo un banda y ta e miho prome representante cu e por ta pa Aruba. E dia cu el a sali pa Polonia e por a mira hopi cambio den su mes y con el a crece como persona. Para na aeropuerto cla pa bula casi 9000km leu for di cas su so, e ta corda cu el a puntra su mes: “What did I get myself into”.
El a bay sin strategia y sin un plan, pero el a bisa cu e lo ta su mes: “Be yourself”. Esaki ta e motto cu a hib’e te den top. Durante casi 3 siman explorando Polonia y prome cu yega na e anochi final tabatin algun competencia. Entre tur e paisnan Aruba a luci ganando e titulo ‘Supra Model of the year Caribbean’. Riba e anochi final cu tur hende tabata sperando y wardando cu ansiedad pa saca Top 24, Rashida a bisa su mes: “Mi a haci mi best, mi no ta worry kico e resultado ta, paso Aruba su nomber a wordo representa grandemente. Mi a inspira hopi mucha y esey caba ta haci mi feliz”.
Despues di un rato, e momento a yega y ora MC a menciona ARUBA, Rashida tabata den shock. Pa prome biaha den un certamen y pa prome biaha cu Aruba ta participa y nos a sali den top. E prome Miss Supranational Aruba, Rashida Schmidt, ta den Focus Digital Magazine di augustus y ta conta cua tabata un reto pa prome biaha den un certamen grand slam. E revista ta accesibel gratis via Apple iStore, Android Google Play Store y www.focus.aw (Menu Tab FOCUS DIGITAL).
Download bo revista awo!
