Cu apenas 5 aña di edad, Guizza Maria Steenvoorde tabata sa cu un escenario lo ta su universo, bailando pa prome biaha cu su grupo. Su presentacion cu Danzation na Zeist, Hulanda dilanti un publico y cu e briyo di e luznan tabata impactante. E dos motornan den tur loke Guizza ta haci ta su mama – Michella – y su oma – Diana – compartiendo e mesun filosofia cu miedo, soledad y retonan bo ta surpasa subiendo e escenario. Esaki ta e trampolin pa sigui siña, conoce, enfrenta y acepta kico ta laga atras y kico ta hiba cu bo den e proximo aventura.
Guizza a muda pa Aruba na momento cu e tabatin 6 aña y tabata hopi dificil pa laga su sernan stima atras na Hulanda. El a siña papia y stima Papiamento, y tambe Aruba su custumbernan. Awendia e ta orguyoso di representa Aruba ya pa 5 aña den Arte di Palabra. Un desafio pa Guizza bibando na Aruba tabata e aceptacion. Supera cu constantemente hende ta bisa te dia di awe pa bay bek bo pais, bo no ta di aki. Hopi no por compronde cu un persona no ta mara na unda el a nace of unda e ta bay. Pa Guizza bo cas ta na unda bo curason ta bati. Arubiano ta esun cu ta stima, balora y respeta nos pais.
Guizza su hobby ta modela y baila unda el a demostra su talento participando na e eleccion di Reina Hubenil di Carnaval y Miss Youth Aruba. Guizza a experiencia un mundo di diferencia. Carnaval ta hopi envolvi cu e publico y un plataforma ideal pa trece bo mensahe dilanti. Pa locual ta su participacion den e certamen di Miss Youth Aruba, e ta prefera pa no duna comentario. Ambos tabatin su retonan y a sirbi nan proposito, unda Guizza a siña un poco mas unda ta su forsa y debilidad.
Locual ta haci Guizza Maria mas orguyoso como muher hoben ta pa tin un bos. Pa por vocifera pa esunnan cu no por y para firme pa nan derecho humano. Guizza a lanta su fundacion “Bestie Club” pa brinda sosten y ayudo na e hobennan. Lesa e entrevista haci cu Guizza Steenvoorde den su totalidad den Focus Digital Magazine di september. E revista ta accesibel gratis via Apple iStore, Android Google Play Store y www.focus.aw (Menu Tab FOCUS DIGITAL).
Download bo revista awo!
