Como un “socialpreneur” enfoca mas riba e bienestar social tabatin su retonan na Aruba pa Charlene Leslie. Despues di casi 9 aña di sigui desaroya y haci diferente intento pa haci e trabou riba e nivel cu e por y kier a haci, e tabata frustrante pa experiencia cu ni maske tin e necesidad y e tin conocemento, habilidad y pasion, esaki no tabata suficiente.
Despues cu Charlene a finalisa su estudio como dietista na Hulanda, el a bolbe na 2015 cu e deseo di por aporta na e salud di Aruba. Despues di a solicita na diferente instancia sin resultado, el a dicidi di cuminsa riba su mes. El a cuminsa na fin di 2016 cu su carera den promocion di salud, trahando na IBiSA, cual el a haci cu hopi placer.
Na 2018 lastimamente el a hay’e atrobe den e posicion di no por a haya oportunidad di trabou y el a scoge pa sigui riba su mes. E biaha aki cu mas enfoke riba promocion di salud, asina Alimentá Dietetics & Health Promotion a nace. Mientrastanto el a sigui cu su Masters den Nutritional Epidemiology & Public Health cu e deseo pa por sigui desaroya den e ramo di Salud Publico.
Charlene a cuminsa explora e parti mas comercial, pero ainda cu e gana pa traha pa bienestar di e comunidad. P’esey ora un colega cercano a mand’e un vacatura na Bonaire, el a solicita e mesun dia. Den algun siman despues di a solicita y pasa algun rond di interview, Charlene a ricibi e yamada cu el a wordo escogi pa e trabou como Beleidsadviseur Preventie en Promotie na e afdeling Publieke Gezondheid (PG) di Openbaar Lichaam Bonaire.
Charlene Leslie ademas di su trabou nobo, e tabatin full e proceso di emigracion, sinembargo asina mes el a sinti y ainda ta sinti manera e ta destino. Den Focus Digital Magazine di september, ex-Miss Universe Aruba ta amplia mas riba su retonan na Aruba y su bida nobo na Boneiro. E revista ta accesibel gratis via Apple iStore, Android Google Play Store y www.focus.aw (Menu Tab FOCUS DIGITAL).
Download bo revista awo!
