Ariba Dia Mundial di Turismo, mi ta uni cu comunidadnan rond mundo pa celebra e impacto cu turismo tin riba cada un di nos su sociedad, economia y medio ambiente. Aruba ta un tesoro di bunitesa natural, cu un rikesa cultural y ta nos responsabilidad pa hunto nos preserva e regalo aki pa e generacion cu ta bin. Turismo no ta solamente un actividad economico, pero tambe e ta un brug cu ta uni nacionnan y ta promove enseñanzanan cultural. Aruba ta ricibi bishitante for di tur rond mundo y pesey ta importante pa recorda practicanan di turismo sostenibel, unda ta respeta nos medio ambiente y honra nos cultura y herencia.
Turismo sostenibel ta parti di e vision di ministerio di turismo. Nos ta comprometi pa crea experiencianan cu ta enrikese tanto pa nos bishitantenan como tambe cu ta respeta nos comunidad local y sistema ecologico. Nos meta ta pa sigura cu turismo ta contribui positivamente na e bienestar di Aruba su hendenan y na e proteccion di Aruba su medio ambiente. Pa logra esaki nos mester di e esfuerso di un y tur, incluyendo gobierno, sector priva, nos comunidad y tambe nos bishitantenan mes, pa asina tur adopta practicanan cu ta minimalisa e impacto ambiental y maximalisa intercambio cultural.
Cu mira pa futuro, ami como Minsiter di Turismo, ta reafirma mi compromiso pa haci di turismo uno sostenibel y responsabel. Laga nos traha hunto pa preserva Aruba su bunita paisahenan, su tradicionnan y tur expresion cultural cu ta haci Aruba un destinacion realmente special. Door di adopta un maneho di turismo sostenibel, nos no solamente ta proteha nos isla pa generacionnan cu ta bin, pero tambe ta eleva calidad di bida pa tur hende cu ta biba riba e dushi pida baranca aki.
Ariba Dia Mundial di Turismo, laga nos celebra nos logronan, refleha riba retonan, y renoba nos compromiso y dedicacion na e industria di turismo cu ta e pilar di Aruba su economia.
Excelencia
Sr. Danguillaume P. Oduber
Minister di Turismo y Salud Publico
