SABRINA SONENSEIN SU BIAHE DI SCURIDAD PA CLARIDAD

Naci na Argentina y bibando na Aruba pa 35 aña, Sabrina Sonensein, a gradua como “Master of Science in Psychology” na 2008 na Universiteit Leiden. Cu diploma den man el a bolbe Aruba, unda ya pa 7 aña e ta traha na Stichting Algemene Bejaardenzorg Aruba como psicologo di nos grandinan. Sabrina a haci e stap na 2017 como psicologo di Centro di Memoria, unda e ta dedica su dianan ta test y diagnostica pashent cu posibel daño neurodegerativo manera demencia. Banda di su profesion, Sabrina ta mama di dos yiu homber di 6 y 8 aña, e ta fundado di Mindful Love Aruba enfocando riba e topico di amor propio.

Pa Sabrina Sonensein e challenge di mas grandi na comienso di su carera como psicologo tabata e falta di pone limitenan saludabel pa su mes y cu otro hende. E tabata busca aprobacion externo y como people pleaser e no tabata sa ni gusta bisa: “NO”. Esaki a haci cu e tabata traha oranan largo y sin cuida su mes debidamente. E trabou no tabata yen’e mas di satisfaccion y poco poco el a cuminsa perde su mes. Sabrina a experiencia cu e trabou di psicologo ta hopi bes uno solitario. Si bo no sa con pa tin un bon balans, delega, maneha bo tempo y busca ayudo bo por haya bo mes ta slip bay yega hopi cerca di un burnout.

Su trabou cu demencia ta uno di sentimento mixto. Di un banda e ta haci su curason contento di por yuda guia y duna sosten na pashent y famia. Di otro banda e ta kibra su curason ora e test pashent y ta realisa con e malesa aki ta daña e celebro y horta e calidad di bida di e persona. Pa Sabrina como psicologo e mester ta empatico pa otro, pero na mesun momento si e kier pa su salud mental ta bon, e mester ta empatico cu su mes. Pa deal cu e impacto emocional den su trabou e ta bay den naturalesa, medita y ora e yega su cas e ta brasa su yiunan.

💇🏼‍♀️💄: Roberto Avalo
📷suhaila Alders

Download bo revista awo!