Durante su infancia Andrea Alfonzo tabata admira e super heroenan; Wonder Woman y Catwoman. E tabata un mucha activo hungando pafo en bes di hunga cu popchi. Su mayornan a dun’e ehempel di un alimentacion saludabel y solamente pa ocasion special e tabata haya un treat di fast food y refresco. Mientras e tabata creciendo, el a participa den competencianan di volleyball, baile y beyesa manteniendo su mes ocupa y feliz.
Andrea su prome vakantie tabata na Aruba y inmediatamente a sinti cu aki ta unda e kier biba. El a muda na 2004 pa Aruba pa bin studia arte culinario y hoteleria. Sinembargo durante e tempo aki cu e presion di estudio y traha, el a stop di practica deporte y cuminsa come mas fast food. Aunke e tabata flaco, el a desaroya problemanan di salud manera colesterol halto y triglicerido.
Su dokter a recomend’e pa cuminsa haci ehercicio y come mas saludabel door cu e tabata hopi jong pa tin e risico di haya un ataca di curason. Esaki tabata e wake-up call cu Andrea tabatin mester, y el a cuminsa core y cushina su mesun cumindanan. Na 2010 el a descubri su amor pa Zumba y añanan despues el a ser inspira pa e disciplina di e atletanan den bikini durante un competencia di bodybuilding.
Andrea ta instructor certifica di zumba, nutricionista y personal trainer, complementando su practica y competencia, a añadi un dimension nobo den su fitness journey. Den Focus Digital Magazine di e luna aki, Andrea Alfonzo ta conta di su biahe mental y emocional sintiendo su mes agradeci y feliz cu su nivel actual, aunke comodidad no ta algo cu e ta permiti den su bida. E revista ta accesibel gratis via Apple iStore, Android Google Play Store y www.focus.aw (Menu Tab FOCUS DIGITAL).
Download bo revista awo!
