Experiencia di pasado a pone Jelisse Boekhoudt bira hopi fuerte como persona. No tur cos tabata semper bunita y lo keda un marca di pasado como un mal experiencia manera hopi hende. E ta sigur cu Jelisse Boekhoudt di antes no ta e mesun di awendia. E ta gosando di un bida hopi dushi haciendo tur locual e ta encanta y pasado ta keda pa pasado! P’esey su nomber artistico dialuna pa diabierna na e emisora Masfm 105.1 ta -Feliz cu Jellyz- presentando su programa tur dia di 6PM pa 8PM. Riba diabierna e ta presenta -TOP 10 ABC- cu e cancionnan mas scucha di Aruba – Bonaire – Curaçao.
Jelisse Boekhoudt a inicia for di un edad hoben den e mundo artistico participando den festivalnan cultural y carnaval. El a presenta sea como corista, solista of cantante di algun grupo di gaita. El a yega di fungi como hurado y MC na algun ocasion, pero tambe a luci riba escenario participando den eleccion di Reina di Carnaval, Miss Aruba y Reina Cultural. Na april 2022, Jelisse a haya oportunidad na Masfm 105.1 como locutora. Despues di a presenta e programa di carnaval -Masfm on Fire- awor Jelisse por wordo sintonisa henter siman como e reina di mas ambiente.
Locual ta resalta mas durante e añanan aki pa Jelisse ta cu apesar di tur circunstancia semper mester gradici Señor pa tur locual cu bo tin. Tin biaha no tur cos ta facil, pero e ta super contento cu su mes di ta un muher mas fuerte. E ta keda perservera y sigui cu su metanan pa haci nan realidad. Musica ta trece alegria den su bida y locual ta resalta mas cu su soñonan poco poco ta wordo realisa. E ta disfruta di bida, di su yiunan y di su famia. Ultimo el a gosa di un dushi vakantie na Europa.
Jelisse Boekhoudt e reina di mas ambiente ta comparti den Focus Digital Magazine di october riba kico e ta enfocando e ultimo kwartaal di e aña aki. E revista ta accesibel gratis via Apple iStore, Android Google Play Store y www.focus.aw (Menu Tab FOCUS DIGITAL).
Download bo revista awo!
