Sharissa Arends Tromp a nace y crece na Paradera. Na un edad hoben, el a muda bay biba na Hulanda, unda el a sigui su estudionan y a logra obtene su Bachelor of Arts den International Relations na Webster University na Leiden. Despues el a sigui un post-HBO den Conflict Resolution and Mediation na Erasmus Universiteit na Rotterdam. Na Clingendael Institute na Den Haag el a obtene su certificacion den International Politics and Diplomacy.
Recientemente Sharissa a logra su certificacion como Vertrouwenspersoon. E ta splica cu un vertrouwenspersoon ta un persona cu ta asisti un otro persona/colega den un organisacion na momento cu ta confronta situacionnan indeseabel. Sharissa a traha como lider di proyecto di Sociaal Crisis Plan, un proyecto cu el a yuda guia cu hopi dedicacion. Despues el a fungi como hoofd Bedrijfsvoering na Algemene Rekenkamer y awo ta lider di proyecto na Directie voor Innovatie.
A traves di e funcionnan cu Sharissa a eherce, el a bira mas consciente di e necesidadnan cu ta existi den nos comunidad. Ta importante pa delinea un maneho cu un strategia holistico cu mester sincronisa diferente sector manera e sector Social, Salud Publico, Enseñansa, Husticia, y Labor. Di e forma aki e maneho por ta mas eficiente den combati hopi reto. Adicionalmente, Sharissa kier contribui na un maneho pro medio ambiente y no mas permiso pa hotel ta importante.
Sharissa Arends Tromp tin 23 aña casa y tin dos yui muhe cu ta su gran orguyo. Su mama, Ella Tromp-Yarzagaray, ta un gran ehempel di un persona cu a y ta dedica su mes pa yuda tur hende sin distincion. Den Focus Digital Magazine di november, Sharissa ta conta cu nunca el a pensa cu un dia e mes lo ta den politica, aunke cu el a wordo puntra na varios ocasion y dicon e biaha aki el a cambia di opinion. E revista ta accesibel gratis via Apple iStore, Android Google Play Store y www.focus.aw (Menu Tab FOCUS DIGITAL).
Download bo revista awo!
