E president di Kiwanis Club of Trade Leaders Aruba, Sherrelise Ras, tin experiencia den e funcion ya cu durante 2018-2019 tempo di Kiwanis Club of Young Professionals Aruba (KYPA) el a lidera e club. E titulo “Distinguished Club” cual ta un reconocemento sumamente valioso como Kiwanian a ser otorga na e club durante su presidencia. Sherrelise ta activo for di aña 2011 cu Kiwanis y el a forma parti for di inicio di KYPA, unda el a fungi ademas di president tambe den mayoria posicion di board. Desde juli 2024 e club ta conoci como Kiwanis Club of Trade Leaders Aruba (KCTL).
Sherrelise su trayecto como boluntario a cuminsa cu e balornan cu su wela a siñ’e, cu ta importante pa yuda otro pa bo por ricibi bendicion bek. Su tanta, Imelda Willems, a inspir’e tempo e tabata organisa evento y fiestanan pa mucha a traves di su negoshi EZ Party Solution, unda e tabata traha como helper. Esaki a desaroya den Sherrelise e pasion pa crea oportunidad pa e muchanan tin felicidad y siguridad a traves di nos como adulto. Como mama semper e tabata motiva su yiunan pa nan tin un futuro positivo. E ta desea cu tur mucha na Aruba tambe tin e bunita experiencianan mescos cu su yiunan.
Kiwanis International ta e plataforma cu a crea e oportunidad pa e por contribui un cambio positivo pa nos comunidad y specialmente nos muchanan. Sherrelise a tuma training di liderazgo di Kiwanis International den su preparacion pa e funcion di president, cual ta cubri maneho di organisacion, comunicacion y team building. Ademas di e training formal, el a acerca mentornan local cu ta lidernan miembronan di Kiwanis pa siñ’e strategianan efectivo pa maneha proyecto y member engagement.
E transicion di KYPA pa KCTL a rekeri reconstruccion di e club y e cambio aki ta pa trece energia nobo den e club. Cu e nomber nobo ta duna e miembronan e oportunidad pa ta lidernan di nan propio trade pues den e ramo di nan trabou of di nan propio negoshi. Tur e miembronan aki tin e mesun deseo pa comparti nan experticio y asina hunto duna bek na comunidad. Esaki ta locual e nomber Trade Leaders ta significa pa Aruba.
Den Focus Digital Magazine di november, Sherrelise Ras ta elabora riba su metanan como presidente di Kiwanis Club of Trade Leaders Aruba (KCTL) pa asina sigui expande nan impacto den e comunidad y esaki specialmente a traves di nan proyectonan. E revista ta accesibel gratis via Apple iStore, Android Google Play Store y www.focus.aw (Menu Tab FOCUS DIGITAL).
Download bo revista awo!
