Cu servicio excepcional den mente, Aeropuerto di Aruba y Aruba Tourism Authority a organisa un variedad di les pa varios grupo por siña e reglanan basico di e idioma Portugues. “Falamos Português – Happiness in Every Language” ta un programa dedica specialmente pa esnan cu ta atende cu e turistanan, diseña pa mehora e experiencia di biahe pa e bishitantenan procedente di Brasil. E prome dos sesion ya caba tuma luga.
Preparando pa ricibi e turistanan
Jo-Anne Arends, Aviation Business Development Executive na Aruba Airport Authority N.V., a inicia bisando cu a culmina e prome seccion di e lesnan di Portugues. Tabatin dos les den luna di november, pa awo cu ta december a tuma un break, den luna di januari lo continua cu e lesnan. E lesnan di Portugues ta un iniciativa di Aruba Tourism Authority y Aruba Airport Authority, caminda nan a uni pa brinda e lesnan di Portugues nan frontliners y stakeholders pa nan por duna un bonbini caluroso na e bishitantenan procedente di Brasil. E lesnan di Portugues ta den cuadro cu e vuelo nobo di Gol Airlines cu lo bula for di São Paulo pa Aruba. Den e lunanan “high season”, Gol Airlines ta programa pa bula tres biaha pa siman. “E siman aki nos a haya e bon noticia cu pa e lunanan di zomer, pues april te cu october di 2025, tambe nan ta confirma cu lo bula tres biaha pa siman. Nos ta sumamente contento cu e acogida pa e lesnan di Portugues, nos a haya seis grupo completamente yen”, asina Jo-Anne Arends a expresa. Alrededor di 100 participante a haya les di Portugues, diaranson mainta a tum’un rato pa duna certificado na esnan cu a participa.
E taxistanan ta contento
Rene Zaandam, taxista pa mas cu 10 aña, tambe a forma parti di e lesnan. A inicia expresando gratitud na Aruba Tourism Authority y Aruba Airport Authority pa invita e taxistanan pa forma parti di e lesnan. Rene Zaandam semper a encanta e idioma Portugues, e ta di pensamento cu e lesnan lo yuda nan hopi pa por comunica di e miho manera posibel cu e turistanan procedente di Brasil. Durante e lesnan, el a siña hopi palabra nobo, e idioma tin un parecido na Papiamento pero cierto accento ta cambia. Rene Zaandam ta gradici Gilda Orfao pa pone atencion riba e comunicacion di e taxistanan mirando cu nan a siña papia over di prijs, rutanan y diferente atraccion pa comunica cu e turistanan.
“Muito Obrigado”
Jean Carlos Arends, di Inmigracion Aruba, a inicia expresando e gratitud di Inmigracion Aruba agradecido pa por haya e lesnan di Portugues. Ricibiendo e pasaheronan di Brasil, ta un alegria pa nan por papia e idioma cu nan. E idioma ta uno bunita pues nan lo expres’e tambe na momento cu e pasaheronan yega Aruba. Loke mas a hala su atencion ta e manera con nan a haya e lesnan for di Gilda Orfao, e lesnan tabata cu hopi animo y claro; esaki a pone cu nan ta presenta na e lesnan pa asina siña mas. Loke mas e lo haci uzo di dje ta “Muito Obrigado” pa gradici e turistanan. Jean Carlos Arends no por a keda sin expresa e emocion cu e ta sinti pa por papia Portugues. Por ultimo, Jean Carlo a gradici ATA, AAA, Jo-Anne Arends, Gilda Orfao y Gobierno di Aruba pa por a duna nan e oportunidad aki.
E lesnan tabata personalisa
Gilda Orfao, kende ta forma parti di The Fishline Team, tabata e docente encarga pa prepara sesionnan interactivo pa diferente grupo manera personal di Inmigracion, Douane, taxista, personal di AAA y ATA pero tambe personanan cu ta traha den e industria hotelero. El a prepara un vocabolario pa cada grupo pa nan por uza pa nan funcion. E lesnan tabata hopi interactivo, pues nan por a haci pregunta y train tambe. P’e siguiente lesnan cu falta nan lo practica mas riba combersacion. Ya caba nan tin e basico. Awo nan lo mester practica hopi pa nan por defende nan mes den e idioma. Gilda Orfao a duna nan diferente opcion pa nan por sigui practica na cas.
E programa aki, “Falamos Português – Happiness in Every Language”, ta coincidi cu e ruta nobo di Gol Airlines for di São Paulo pa Aruba, programa pa lansa tres vuelo semanal entrante 18 di december. Cu un cantidad creciente di bishitante for di Brasil, Falamos Português ta un stap esencial pa garantisa cu nan ta sinti nan mes na cas for di e momento cu nan pone e prome stap riba nos isla Aruba.
