E deseo semper di Ruthlin Werleman y Carlos Kock tabata pa celebra nan enlace matrimonial den exterior. Nan a yega di bishita Medellin diferente biaha, un ciudad cu ambos ta haya espectacular y principalmente den e luna di december. P’esey nan a scoge 7 di december 2024 pa nan bendicion nupcial, un fecha hopi special na Colombia, cual ta celebracion di Noche de las Velitas. Un otro motibo pa dicidi pa un destination wedding ta pa e estilo con na Colombia por a logra realisa e boda di nan soño y den un presupuesto cu na Aruba dificilmente por a iguala, cu e elegancia y detayenan unico.
E pareha a conoce otro 15 aña pasa tempo cu Ruthlin a cuminsa train canta cu Las Unicas Fabulosas. Ruthlin tabata front-line di Las Unicas y Carlos tabata e persona encarga cu e zonido pa e grupo. Un anochi cu nan tabatin un toca na Club Brazil, a resulta den un di e momentonan mas bunita di nan bida. Carlos a acerca Ruthlin y el a rek’e pa dun’e su prome sunchi. Esey tabata un momento super bunita cu te dia di awe ambos ta papia over di e anochi ey, paso e tabata realmente manera un novela.
Ruthlin actualmente ta traha na Tuscany Residence Aruba como administration clerk.
E tin 1 aña y 3 luna trahando eynan y den su tempo liber e ta traha joyanan Handmade. Carlos ta traha na Korps Politie Aruba, unda e tin 15 aña trahando como polis y como side job e ta haci trabou construccion. Como pareha nan semper kier t’ey pa otro den bon den malo. Nan amor no conoce frontera, ni limite y no tin final. Den Focus Digital Magazine di januari, Ruthlin y Carlos ta comparti mas detaye di nan bunita storia di amor y tambe potret como video di nan boda espectacular na Medellin. E revista ta accesibel via Apple iStore, Android Google Play Store y www.focus.aw (Menu Tab FOCUS DIGITAL)
Download bo revista awo!
