Riba e curpa di Candy Reino a ser pinta artisticamente pa e portada di Focus Digital Magazine, e arte Hapones KINTSUGI. Esaki ta un arte cu ta repara den oro of plata algo di glas cu a kibra. E pintura ta resalta e historia di e pieza y tambe e luga unda el a kibra. Di e forma aki ta resalta su beyesa y no ta sconde. KINTSUGI ta duna e pieza cu a kibra un oportunidad nobo y ta haci’e hasta mas bunita cu su version original. Candy ta kere esey ta e forma cu nos mester tuma e retonan. Pa siña di nan y resalta cada un di nos heridanan, pasobra e ta bira parti di nos historia unico.
Candy a pasa dos aña pasa den e situacion di mas duro y doloroso, cu el a yega di pasa aden den su bida. Mientras e tabata lucha cu su propio tristesa, el a hay’e obliga na enfrenta e huicio di hendenan desconoci riba e rednan social. Pa su sorpresa, e mayoria di e palabranan mas duro a bin di e hende muhenan, kendenan no sa su dolor y cu no tabata compronde e nachtmerrie cu e tabata bibando. Sinembargo nan tabata specula, critica y exigi splicacion for di dje.
Riba e rednan social e ta wak con facil e ta pa e muhenan husga y ataca otro en bes di ofrece apoyo. E sa, pasobra desafortunadamente el a biba esaki den carni propio. Candy a habri su cas y curason pa un amiga cu el a stima profundamente. Un beso persona cu a lucha cu depresion durante añanan largo. Sinembargo lamentablemente el a perde e bataya y el a kita su bida den Candy su cas.
Den Focus Digital Magazine di maart por lesa mas di e proceso cu Candy a pasa aden y su bida awendia na Bonaire. E revista ta accesibel via Apple Store, Android Google Play Store y www.focus.aw (Menu Tab FOCUS DIGITAL)
Download bo revista awo!
