Un personahe cu amplio trayectoria den e mundo di beyeza cu a coach varios miss y reina exitosamente ta comparti su comentario di Guizza Maria Steenvoorde participando den e certamen di Teen Universe International. Endy Croes ta conoci pa ta para semper tras di loke e ta papia a base di experiencia propio. P’esey tempo cu el a haci un cobertura di Miss Universe como ‘missologo’ el a haya hopi acogida internacional.
For di Hulanda Endy a sigui Guizza su participacion na Teen Universe y el a keda impresiona cada dia cu su envolvimento y manera di presenta su mes manera un “berdadera dama”. Endy ta splica cu Teen Universe ta un certamen unda cu mas tanto paisnan Latino ta exitoso, pasobra e certamen aki ta wordo mira como e trampolin pa esunnan cu tin e potencial pa un dia representa nan pais na Miss Universo, pues e caliber di e candidatanan ta hopi halto.
Guizza for di su salida di Aruba caba a percura pa mustra su presencia, sin ta intimida pa e paisnan cu ta custuma di ta faborito. For di e escogencia di cada look/salida unda cu bo ta mira cu a pone atencion pa crea diferente look completo for di pia te cabes, mustrando tambe un significado tras di cada look. Esaki ta e nivel cu Aruba mester tin na tur certamen internacional pa por percura impacto continuo.
Guizza su porte, su aura, su dulsura y presencia tur ta “grita” cu aki nos ta tratando cu un reina. Endy ta pone enfasis: “Esey no kiermen cu ta den Guizza so mi ta reconoce e atributonan aki, pero tin 3 otro pais tambe cu ta duna mi e mesun sensacion y entusiasmo ora cu mi mira nan salidanan. Aki mi ta referi na Venezuela, Colombia y Curacao tambe. Loke ta dificil ta cu nos no sa con entrevistanan cu hurado a bay den priva. Aki ta unda e diferencia lo sinta pa determina ken ta bira Teen Universe 2025. Pasobra si nos djis basa nos mes riba stage performance, aki tur ta batayando na e mesun nivel”.
Pero Endy ta mira den Guizza e gana, e hamber pa triunfa y trece e prome corona cas pa Aruba. Su ekipo a percura pa haci un trabou formidabel y admirabel, y tambe merece tur merito tras di Guizza su presentacion y salidanan excepcional. “Mi deseo mas grandi ta pa mira Guizza wordo corona awe nochi y algo ta bisa mi cu chance ta grandi cu e lo sosode tambe. Guizza mester djis percura pa ora di papia e keda autentico y papia di su curason humilde. Di awo caba, pabien Guizza y danki pa representa nos di e forma cu bo a hacie!”
