E oportunidad di por sigui crea un networking ainda mas grandi y por sigui conecta cu e mundo di beyesa ta locual ta e pasion mas grandi di Roberto Avalo. Esaki ta e persona cu ademas di su experiencia den certamennan di beyesa como coach y estilista, a pone tur su amor y dedicacion pa Guizza Maria Steenvoorde ta impactando den e certamen di Teen Universe luciendo semper maraviyoso.
Roberto ta expresa cu satisfaccion cu for di nan yegada na Republica Dominicana, e ta un experiencia magnifico. Na unda cu el a drenta ta un universo cu ta inspir’e pa traha 24 ora cu amor y ilusion. El a presencia di cerca diferente certamen internacional y ta haya e organisacion di Teen Universe ta hopi profesional. Nan ta bon organisa y tin contesta riba tur pregunta. E factor cu nan ta hopi detayista ta pone e certamen riba un nivel halto.
E meta ta pa trece e corona Aruba, cual ta su focus for di e prome dia. Un team tremendo cu ta prepara den tur detaye y ta un steun grandi p’e na e certamen di Teen Universe 2025. Roberto ta sinti hopi orguyoso di Guizza, cu a sa di demostra di ta un hoben cu un bunita curason, fuerte y un curashi cu bo no ta haya facil den un persona di su edad.
Un factor importante den e certamennan ta e comentario di e missologonan y riba esaki Roberto ta señala: “Bueno, nos ta ranking den e Top 5 tur dia cerca mayoria missologo y cada dia e ta wordo menciona pa su trahenan y su beyeza unico. Nan ta mir’ e den Top 3. Guizza tin un aura rond di dje dificil pa splica y ta traha duro pa sobresali cual ta fabuloso. Guizza ta agradecido pa e oportunidad cu bida ta brind’e pa pone riba e escenario aki. E siman tras di lomba mi a mira cu el a crece masha hopi mes y e kier hiba e corona di Teen Universe cas”.
Guizza Maria Steenvoorde ta competiendo cu 29 candidata for di rond di mundo. Teniendo na cuenta calidad y personahe, Roberto ta sigur cu tur tin un chens, pero ta resalta Colombia, Chile y Venezuela. Si wak e opinion di e missologonan mayoria ta postula nan semper hunto. Aruba a sa di resalta seguramente memey di tur e candidatnan pa su vestuario cu a wordo meticulosamente hinca den otro cu ta cuadra cu e look cu nan kier proyecta. Un mucha muhe TEEN, un estilo barbie di colornan cu ta cuadra cu Guizza su personalidad.
“Nos a traha duro pa yega na esaki y pa bisa berdad na final 50% nos a bin cu ne. Y mi ta orguyoso di nos diseñadornan local cu ta kere den Guizza y a pone parti di nan coleccion disponibel. E comentarionan ta papia pa nan mes. Increibel con versatil Guizza a cambia manera un cameleon cada dia pa hinca su personalidad den su trahe y su presentacion”, Roberto a finalisa su entrevista pa asina sigui cu e parti final di Teen Universe 2025 na Punta Cana, Republica Dominicana. EXITO 
