Pa ta riba e escenario di e certamen mas prestigioso universalmente, no tabata un soño di Hannah Arends for di chikito. Como mucha e tabata gusta hunga pafo cu auto y futbol, pero si e ta un persona semper hopi patriotico. Esaki tabata su incentivo pa participa den e concurso di Miss Aruba pa por representa su pais y su cultura internacionalmente. Hannah ta defini su mes como un persona alegre, perseverante, spiritual y di hopi fe. Di tur situacion e ta busca e banda positivo en bes di enfoca riba con dificil e situacion por ta e momento ey.
Hannah a cuminsa haya durante su adolescencia interes pa e mundo di moda y modelahe locual a hib’e pa forma parti di Chaz Models. Como un Arubiano orguyoso el a bay representa Aruba na Reinado del Café 2019 na Colombia. Despues di esaki el a focus riba su estudio y carera, y a pone e mundo di beyeza completamente un banda. Hannah a studia ley y ta trahando actualmente como hurista y tin pasion pa muziek, e ta toca drum y guitara. E ta den e proceso pa saca su prome cantica.
Entre su trabou y hobby cu tabatin su bida ocupa, el a dicidi e aña aki cu e kier participa pa Miss Universe Aruba. Hannah a gana e titulo maximo cual a dun’e e privilegio pa carga e sjerp cu e nomber di ARUBA na Thailand den certamen di Miss Universe 2025. Pa Hannah e ta mas cu un honor pa por representa su dushi isla y su hendenan riba un plataforma asina grandi manera Miss Universe. E ta orguyoso di por a nace riba e pida baranca aki cu no ta solamente bunita, pero cu hendenan caluroso, amabel y servicial. Esakinan ta cualidadnan cu e lo kier refleha riba un escenario manera Miss Universe.
E mayor desafio riba Hannah su caminda pa Miss Universe tabata cu e mester a siña laga los di e pensamento cu tur cos mester bay perfecto y tin tur cos bou control, paso hopi biaha cosnan no ta cana perfecto manera e kier. Den Focus Digital Magazine di e luna aki Hannah Arends ta comparti cual ta su mensahe cu e ta desea di laga atras na Thailand y su soño cu e kier pa wordo realisa. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
