For di hopi jong, creatividad tabata un parti natural den bida di Quiana Cronie. Su mama, un artista riba su mes tabata inclui Quiana semper den su tayernan na Savaneta. Nan a explora pintura, concret, mosaik y papier-mâché. Ambos mayor a curash’e pa crea cu su mannan. E ta corda con el a lanta ta cana pia bou y pasando tempo cu e animalnan — semper curioso y creando. Despues di a caba HAVO su plan inicial tabata pa studia business y y construi algo di su mes. Sin embargo durante su gap year na 2016, el a join un curso preparatorio di arte na AFADA na Aruba. E experencia ey a cambia su direccion y a pon’e realisa cu creatividad tabata mas cu un hobby — e tabata su pasion.
Quiana na prome instante a explora diseño grafico, fotografia y film. El a tuma un curso di Carlo Wijnands, caminda nan a upcycle un T-shirt. El a scoge un shirt bieu di AHATA cu “Aruba” y a crea esaki di nobo rond di e problema di dump di e isla. Quiana a organisa un sesion di potret na dump y a comparti esaki riba e rednan social. E reaccion tabata increibel — e hendenan tabata kier cumpra e T-shirt. E momento ey a inspir’e su propio liña di T-shirt, QC Apparel. Su mama a dun’e un fiansa chikito y aunke e tabata nervioso, su prome lote a bende mesora. Quiana a paga su mama bek y a reinverti den e marca. Esaki a siñ’e locual ta confiansa, entrepreneurship y kere den su ideanan.
El a muda pa exterior pa studia Product Design na Design Academy Eindhoven. Quiana a sigui bende T-shirt na Aruba y Hulanda, aunke menos mientras e tabata enfoca riba su estudio. Su trabou a evoluciona den piesanan cu por bisti, experimentando cu construccion di paña, doblamento inspira pa origami, y e relacion entre forma, funcion y material. Un tema cu tabata ripiti tabata durabilidad: diseña piesanan cu ta dura fisicamente y emocionalmente. Su estetica tabata mimimalista, geometrico y monochrome. Den su ultimo aña di estudio, el a busca un conexion mas profundo — algo berdadero p’e y su raiz.
Quiana a regresa Aruba pa reconecta cu su cultura. El a haci investigacion riba paña tradicional di Aruba y a haya e ‘cashaca’, bisti pa piscado y cunuceronan alrededor di 1860. Nan tabata traha paña for di saco di hariña — di aki e dicho “come hariña bisti bari,” cu ta nifica “come e hariña y bisti e saco”. E historia aki a resona profundamente, reflehando resiliencia y ingenio — balornan central pa su filosofia di diseño. El a imagina bek e ‘cashaca’ uzando mantelnan di e industria hotelero, mesclando tradicion cu sostenibilidad y honrando Aruba su herencia. Quiana reflehando ta bisa: “Ora mi wak bek, mi biahe — for di curiosidad di infancia, experimentonan di upcycling, educacion di diseño, te na contamento di historia pa medio di paña — a hiba mi aki. Mi trabou ta mescla artesania, concepto y cultura”.
Quiana Cronie ta splica den su entrevista cu Focus Digital Magazine di november di ki forma e cultura di Aruba ta influencia e diseño di su marca di paña. Unda e lo kier Cashaca yega a traves di contamento di historia, unda e palet di Aruba ta filtra den asesorionan, diseño di scenario y contamento di storia visual, mesclando funcion cu cultura expresivo. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
