Fin di Aña den ambiente y cu cas dorna sin gasta demasiado placa, balorando specialmente locual nos tin caba. Pa nos por drecha nos cas pa e temporada aki cual porcierto ta un luna di basta gasto, e tipnan ta lo siguiente:
1. Haci uzo di elementonan natural pa material di adorno manera nos mesun matanan, flornan y blachinan seco. Añadi un ‘string’ di luz of bela y asina traha por ehempel un bunita centerpiece.
2. Prome bo core cumpra cos, ruim op cas y inventarisa kico bo tin na cas cu bo por uza bek of drecha/cambia pa bo por uz’e di nobo.
3. Wak riba plataforma online cosnan cu bo mes por traha cu materialnan cu bo tin caba. Por ehempel si bo tin un vaas bo por verf, yene cu bala di kerstboom y pone luz den.
4. Bo por spaar di trempan den aña y pasa e tiendanan. Tin tienda cu tin adorno di aña pasa na 50% den e temporada di september.
5. Durf bende bo adornonan cu bo no ta uza mas cu ta den bon condicion y asina cumpra nobo si bo ta desea esey. Asina bo cas no tin yen cos cu bo no ta uza y bo ta gana poco placa.
6. Si bo no kier gasta hopi placa na dorna bo cas completo, bo por escoge un area di bo cas y esey so bo ta dorna.
7. Bo sa cu tin biaha espacio ta manera un decoracion? Percura pa haci e cas limpi, benta e cosnan cu no ta sirbi mas afo y loke ta bon por rebende.
8. Un cos cu ta sumamente importante ta pa bo gosa Fin di Aña sin surpasa bo budget. P’esey ta necesario pa bo presupuesta cuanto placa bo ta uza pa decora bo cas. Percura pa keda na e budget como sea.
9. Corda traha bo lista pa bo cumpra loke bo tin mester pa decora y no cay den tentacion pa tur e cosnan cu bo ta wak cu ta bunita.
10. Corda despues no tin caminda ni pa pone nan ni warda nan. Un cas sin “rommel” ta un cas bunita y no ta sinti pisa.
Tur luna Cristina Tromp di Balor Consultancy & Services ta comparti conseho den Focus Digital Magazine tocante con pa maneha bo presupuesto. E revista ta accesibel via Apple Store, Android Google Play Store y www.focus.aw (Menu Tab FOCUS DIGITAL)
