Aeropuerto Internacional Reina Beatrix ta informa cu ta anticipa cu e operacionnan di aeropuerto lo ta operacional normal, mañan diadomingo 4 di januari 2026.
Awe, for di 58 vuelo di entrada y salida cu tabatin programa, a cancela un total di 44 vuelo, incluyendo 38 vuelo di Merca y 7 vuelo di otro paisnan. Aeropuerto di Aruba ta trahando den coordinacion estrecho cu partnernan di aerolinea y autoridadnan di aeropuerto pa acomoda e pasaheronan afecta na un manera sigur y eficiente.
Como resultado, aeropuerto ta anticipa un dia operacional mas ocupa cu normal mañan, ya cu awe originalmente tabata anticipa pa ta un dia di biahe di gran cantidad di pasahero (“Super Saturday”), cu 58 vuelo y aproximadamente 15.000 pasahero programa pa procesa.
Ta conseha e pasaheronan cu vuelo confirma pa yega aeropuerto na tempo pa nan salida programa. Medidanan di control di fluho di pasahero lo keda na vigor pa sostene operacionnan safe, sigur y ordena.
Pasaheronan cu nan vuelonan a keda cancela awe, como tambe biaheronan sin un vuelo confirma, ta conseha encarecidamente pa no presenta na aeropuerto y pa tuma contacto cu nan aerolinea directamente pa rebooking y areglonan di biahe.
Aeropuerto di Aruba lo sigui vigila e situacion di cerca y duna actualisacion manera cu ta apropia. Ta curasha e pasaheronan pa check directamente cu nan aerolinea y bishita www.airportaruba.com pa haya e informacion di vuelo mas actualisa.
Aeropuerto di Aruba ta gradici tur e partnernan di aeropuerto di antemano pa nan cooperacion y sosten continuo mientras ta traha pa un regreso sigur y ordena na normalidad mañan. Haya sa mas di loke ta sosode na AUA Airport door di bishita www.airportaruba.com y conecta cu AUA Airport riba Twitter.com/Aruba_Airport, Facebook.com/ArubaAirport, Instagram.com/arubaairport, TikTok.com/@arubaairport y Linkedin.com/ArubaAirport.
