E ta fascina cu e cultura di cuminda Caribense, resiliencia di comunidad y contamento di historia visual. Gerald “Gino” Kock PhD, su experiencia ta abarca diplomacia culinario, consehero di gobierno y un interes emergente den e poder di sanacion spiritual di cuminda Afro-Caribense. Gino ta Culinary Ambassador pa World Food Travel Association (WFTA) y ta dirigi programanan di educacion y apprenticeship na Aruba y como Dean of Student Affairs na e colegio comunitario local. E tabatin e oportunidad di por a mira cu su propio wowonan con e tradicionnan di cuminda, creatividad y conocemento local por fortalece comunidadnan y crea oportunidadnan real.
World Food Travel Association (WFTA) a ser funda na 2003 como un NGO, cu su mision principal ta pa preserva y promove e cultura culinario y herencia di cada destinacion turistico. Esaki por ser haci door di traha directamente y hunto cu e comunidad local, e productornan artesanal y otro negoshinan cu ta enfoca riba e productonan local. Gino a inicia na 2012 cu un proyecto comunitario cu tabata yama “Chanita ta di Fiesta” cual su meta tabata pa crea e laso entre e productornan local, e chefnan di e restaurantnan cu ta promove y uza e productonan autentico di Aruba, pero tambe cu e turistanan pa averigua si nan ta interesa den nos platonan local.
E network crea entre e tres pilarnan menciona aki, pues e cunuceronan, chefnan, consumidornan local y internacional ta cuadra indirectamente cu e metanan di WFTA, pero specificamente pa Aruba. Gino su meta tabata pa e tempo ey tambe expande pa otro islanan den Caribe. E retonan principal, apart di por inventarisa kico ta nos productonan di cuminda local y ingredientenan di nos cuminda tipico, ta pa logra un balans entre “oferta y demanda” – supply and demand -. Nos por promove nos cultura culinario, pero si nos no por suministra e ingredientenan autentico na e clientenan, nos tin un problema serio.
Segun Gino tin hopi motibo su tras e pakico e productor of cunucero no por produci e productonan autentico aki. E por ta costo di haci negoshi – cost of doing business – na Aruba, costo halto di awa, falta di experencianan tecnico pa agricultura innovativo. Esaki no ta na Aruba so, pasobra por mira na mayoria di islanan den Caribe cu ainda ta depende aproximadamente 90% riba cumindanan importa, y esaki ta bisa hopi di e desbalansa aki. Pa balansa tendencia aki, e prome cos ta sigui crea conscientisacion riba e importancia pa preserva nos herencia culinario.
E legacia cu Gino ta spera di laga como un Culinary Ambassador ta por a contribui na defende e preservacion y celebracion di nos herencia culinario, tanto na Aruba y den region Caribe. Den edicion di Focus Digital Magazine di januari, Gino ta splica tambe cua ta e rol, ritual of simbolismo den preparacion di cuminda Afro-Caribense. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
