Heredando e espirito aventurero di su mayornan Portugues, kendenan a inmigra for di Madeira pa Curaçao, Mayra Spinola su propio historia na Aruba a cuminsa 28 aña pasa. El a tuma e desicion na un edad jong pa bin biba aki. E ta di cuater di un famia di 6 ruman muhe – Girl Power – y ta mama di dos yiu muhe maraviyoso. Su famia ta su barranca y su fundeshi indescribibel. E poder femenino ta e legado y inspiracion cu ta motiv’e tur dia. Mayra su carera a cuminsa na Maggys como Beauty Advisor y eynan el a crece logrando un posicion direct cu L’Oreal Travel Retail Americas Head Offices na Miami y Paris. Actualmente e tin15 aña trahando como Commercial & Trainer Manager pa e region di Caribe.
Cu un curason di inmenso gratitud, Mayra Spinola ta gradici Dios pa un oportunidad nobo pa biba. El a nace cu un problema di curason y cu 2 luna el a wordo diagnostica cu Anomalia di Ebstein – un defecto di curason congenito raro cu solamente 1 di cada 10.000 hende ta nace cu ne. Un momento crucial den su bida a surgi despues di añanan di maneha su condicion, ora su Cardioloog a bis’e cu un ‘open heart surgery’ tabata e unico solucion. Dia 6 di october 2025, Mayra a drenta den sala di operacion na LaCardio Bogota. E miedo y incertidumbre tabata inmenso, pero danki na e operacion aki su calidad di bida lo mehora y por biba un bida normal y pleno.
E sintimento di miedo y incertidumbre tabata inmenso ora e cardioloog a bisa Mayra cu operacion tabata necesario. Toch den enfrenta e desicion grandi ey, el a descubri un resiliencia interno profundo. Mayra a scoge pa confronta e reto ey, combertiendo miedo den fortalesa. Y laga tur cos den man di Dios como un persona hopi creyente y cu hopi Fe. Pa Mayra e berdadero reto no tabata djis e procedura; tabata e pensamento di miedo di no lanta, di laga su famia stima atras – su mama, su rumannan y su yiu muhenan. E miedo ey tabata inmenso. Toch den e momento increiblemente vulnerabel ey, e amor pa su famia a bira su forsa di mas grandi. El a transforma e miedo ey den un resolucion indestructibel pa bringa, pa wanta y pa regresa cerca nan.
Mayra ta corda cu dia 6 di october cu e mester a haci e ‘open heart surgery’, el a drumi basta bon y a lanta 5’or di mainta. El a resa su rosario cu su yiu a regal’e di Virgen di Fatima di Portugal. E no tabata sinti e dia ey hopi nervio y tabata basta trankil. El a haci tur e preparacion necesario prome cu drenta 8’or di mainta den e sala di operacion y despedi di su famia. Despues el a haya anestesia y e no sa mas te ora el a lanta intuba den ICU cual p’e tabata horibel. Sin por a papia y sinti cu e ta bay hoga, pero e tabata fuerte y el a purba keda trankil. Su pulmonnan mester a cumisa traha bek prome nan saca e tubo. Mayra su yiu y su ruman por a bin wak’e, pero esaki tabata hopi dificil pa nan wak’e asina intuba.
Mayra por a tende nan stem di spanto y e tabata mustra nan su man manera cu e ta okay. Aunke e tabatin 2 tubo den su bariga, uno den su garganta y 2 IV na su man den ICU, unda el a keda 24 ora pa wordo monitor y recupera bek. Su curason mester a haya forsa bek y pulmonnan mester a start bek riba nan mes forsa. Mayra Spinola ta conta detayadamente den Focus Digital Magazine di e partinan mas dificil durante cu e tabata interna na LaCardio Bogota y con e operacion a afecta su salud mental y bienestar emocional. E revista di januari ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
