E inspiracion di Natalia Koolman tabata pa crea un cultura di koffie na Aruba – un luga unda e hendenan por conecta pa hala rosea, papia, hari y disfruta di un koffie perfecto. Un luga cu tin vibracion y alma, unda no ta djis ‘bebe un koffie’ pero ta biba e momento den un ambiente unico. Aru-bean ta e soño di su propietaria pa hiba e “coffeehouse feeling” pa nos isla cu amor, pasion, calor y calidad cu bo no ta haya na cualkier luga. For di un soño chikito el a crece cu dedicacion y sacrificio pa actualmente na dos localidad cual ta floreciendo grandemente.
E experiencia desde inicio pa awendia cu dos Aru-bean Coffeehouse pa Natalia tabata un rollercoaster hopi dushi mes! Un trabou inmenso cu hopi anochi ta traha duro sin drumi y hopi lagrima tambe door di stress… pero alabes hopi sonrisa. E ta un satisfaccion ora ricibi e palabra “danki” di nan fiel clientenan cu a bira manera famia. E ta trece hopi felicidad ora Natalia mira e hendenan feliz den e espacio cu el a crea. E ta un bendicion cu ta exigi tur cos, pero cada desafio a haci nan mas fuerte y mas convenci cu nan ta haciendo algo hopi special.
E satisfaccion maximo di ta doño di Aru-Bean Coffeehouse ta pa mira e hendenan feliz den e coffeehouse. Mira pareha riba date, amigonan dibertiendo, famia compartiendo, turista dicidiendo di bin tur dia… y nan ta bisa: “Aki ta mi luga faborito na Aruba”. Ora bo ta crea un sitio unda e hendenan ta sinti nan mes na nan cas, unda nan ta keda hunto mas tempo, pasobra nan ta comfortabel… esey ta e satisfaccion mas grandi. E ta e orguyo diario di Natalia Koolman. Natalia ta expresa su pensamento con e ta mira e cultura di koffie evolucionando na Aruba y con Aru-bean Coffeehouse ta contribuyendo na esaki. Lesa e entrevista den Focus Digital Magazine di januari cu ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
