Despues di 23 aña cu Marylain Ras a bay cu e titulo di segundo finalista di Reina di Carnaval, el a cumpli cu su deseo di kier competi un dia pa Sra. Carnaval. Momento cu el a ricibi e proposion pa representa TOB, el a bisa: “SI”, sin pensa dos biaha. E ta un honor di por representa su grupo di Carnaval y HOH caminda e ta traha cu hopi amor y dedicacion pa 15 aña. Su apoyo mas grandi durante e trayecto aki tabata su famia, su yiunan y su pareha. E team di HOH tambe cu desde e prome dia tabata 100% cu nan reina y a regla tur cos sin mester a pidi nada.
Marylain a cuminsa traha na Horacio Oduber Hospital (HOH) na aña 2011. E ta forma parti di e Management Team di HOH y ta manager di International Patient Office (IPO), Business Office, Medical Records y Travel & Accommodation. E mas bunita pa Marylain di traha na HOH ta cu bo ta siña balora y aprecia bida hopi mas y tambe ta agradecido na tur locual cu bo tin. E sentimento di gratitud e tin tambe recordando su bunita infancia y hubentud. Marylain a lanta cu su mama na cas di su wela y welo na Cura Cabai.
Awendia e ta mama di 3 yiu: 1 yiu muhe y 2 yiu homber, cual 1 ta cu su pareha cu tabata su apoyo den ful e proceso aki. Su pareha tin un yiu homber cu tambe ta manera su yiu. Nan tur na cas ta disfruta di carnaval y ta un parti bunita di nan bida. E momento cu Marylain Ras a keda eligi Sra. Carnival Aruba 2026, e tabata un sentimento yena di emocion y felicidad. E no tabata sa si pa yora of pa hari.
Marylain tabata para riba stage y e ta wak su famia, su team di HOH cu tabata desde e prome dia cu ne, su amistadnan, coleganan, con contento nan tabata, ta bula, hari y yora di felicidad, esey nunca e lo lubida. E momento eynan, nan tur a gana! Por lesa mas di nos Sra. Carnaval 2026 den Focus Digital Magazine di februari, cu ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
