Na prome instante Kimberly de Boer no por a kere ora a anuncia Corsou como Reina Hispanoamericano 2026. E tabata honestamente un shock completo p’e. E ta corda con e tabata sinti su curason bati, su mente ta draai y un mescla di emocion a podera di dje. E tabata un di e momentonan caminda tur cos a sinti asina ireal, manera un soño cu e no kier a spierta. Na mes momento el a sinti un ola di orguyo, pasobra representa Corsou riba un escenario asina significativo tabata un honor. Un promesa na su mes pa duna e miho di dje, probecha di cada momento y mustra mundo e bunitesa, cultura y espirito di su isla.
Kimberly su infancia na Corsou tabata maraviyoso rondona pa amor, calor y balornan familiar fuerte. Creciendo den un hogar mixto, Europeo y Caribense, a permiti’e experencia e bunitesa di diferente cultura for di hoben. Nan cas tabata yen di alegria, musica y apoyo, y su mayornan semper a motiv’e pa expresa su mes creativamente. Como ruman muhe mayor, el a desaroya un sentido fuerte di responsabilidad y empatia. Kimberly su famia a crea un espacio sigur caminda el a sinti’e apoya, hasta durante e momentonan di insiguridad. E base ey di amor y union a forma e muhe sigur y cu su pianan para firme ken e ta awendia.
Creciendo na Corsou a forma Kimberly tambe den un hende muhe cu ta brasa diversidad, resiliencia y autenticidad. Biba riba un isla chikito cu mas cu 50 nacionalidad a siñ’e for di jong pa respeta diferente cultura, idioma y perspectiva. Lanta den un comunidad uni, a lag’e sinti su mes apoya, pero tambe siña responsabilidad, sabiendo cu e ta representa no solamente su mes pero su isla. E colornan, e creatividad, e calor di e hendenan y e sentido profundo di union ta influi con e ta mira mundo. Danki na Corsou e ta conecta cu su ‘raiz’ profundamente hancra segun cu e ta soña mas aleu cu e horizonte, ambicioso, orguyoso pero humilde.
Kimberly de Boer ta defini su mes como un hende muhe cu ta tanto suave como fuerte. E ta empatico, creativo y profundamente pasiona pa tur loke e ta haci. Creatividad ta den e nucleo di ken e ta; ta e forma con e ta expresa su mes y conecta cu otronan. Na mes momento, e ta resiliente y determina. Kimberly a enfrenta insiguridad y ansiedad, pero e experencianan ey a forma su fortalesa y a siñ’e perseverancia. E ta lidera cu bondad, autenticidad y curason. Riba tur cos, e ta un hende cu ta kere den crecemento, den evoluciona, siña y motiva otronan constantemente pa brasa cu nan ta singular cu confiansa y orguyo.
Reina Hispanoamericano 2026 ta conta den Focus Digital Magazine di e luna aki dicon e certamen di Miss Universe cu el a competi na 2024 no tabata e experencia cu el a spera y no a sinti manera e Miss Universe cu e tabata conoce y encanta. Lesa e interesante entrevista cu Kimberly de Boer den e revista cu ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
