Sin bay les of curso formal, Egbert a siña e arte di mosaik door di experencia practico. E ta un persona cu ta balansa e bida laboral cu e pasion pa mosaik. Su trabou na banco ta ocupa su dia, pero ora yega cas e ta dedica tempo na su pasion, cu ta relah’e despues di un dia di trabao. Den weekend ta e tempo ideal pa concentra mas riba su proyecto di mosaik. E ta bisa: “Mosaik ta mas cu un hobby pa mi, e ta un forma di terapia y creacion artistico”. Egbert Leest tin actualmente 4 aña ful den mosaik y su arte ta sigui evolucionando.
Mirando un amiga, Audrey Curiel, cu e proyecto di mosaik di e bankinan den caya grandi na San Nicolas, a spierta Egbert su curiosidad den e arte aki. E tabatin un par di tegels na cas y el a cuminsa cu su cushina uzando e tecnicanan di mosaik pa expresa su vision artistico. Mesclando e contrastnan el a crea un efecto magico. E trabao mas grandi den e arte di mosaik ta grout, un proceso cu ta exigi pasenshi y precision artistico. El a dura 10 luna pa caba cu su cushina y e resultado tabata un obra di arte cu a engrandece su pasion. Esaki a pone cu el a namora di arte y sigui mas profundo den dje, unda cada obra ta un reflexion di su alma artistico.
Na aña 2022 el a bay un workshop na Savaneta di un artista Chileno, Isidora Paz Lopez, hunto Mike y Merv, unda nan a comparti secretonan di e arte di mosaik. Pa Egbert su gran sopresa nan tum’e den e proyecto di e trapi di Rogers Beach, un experiencia cu a inspira su arte mas ainda. El a siña hopi y tabata un bunita experiencia, cu a haci’e sinti mas conecta cu e mundo artistico. Na mei 2025 el a haci un curso di Picassiette Mosaic cu Enrita Werleman. Egbert a traha un skull, un proyecto cu a demostra su creatividad y dominio di e tecnica cu tayo y scoter.
Egbert gusta ta su so den su tayer. E ta pone su musica y ta drenta den su mundo di mosaik creando un ambiente di inspiracion y pasion artistico. E proceso creativo ta cuminsa cu inspiracion – e ta wak cosnan den naturalesa, cultura Africano y Japones of den su ambiente di skulls pa saca ideanan. Despues e ta haci un sketch simpel di e diseño di mosaik cu e kier crea. E siguiente paso ta selecciona e colornan y tiponan di tegel. Ora e plan ta cla ta corta e tegelnan y acomoda nan paso pa paso te cu e pieza ta forma e imagen final.
Egbert ta haci un prueba tambe di e combinacion di color y textura pa sigura cu e resultado final ta exactamente con el a imagina. E proceso ta un mescla di planificacion, experimento y pasenshi te cu e obra ta completo. Den Focus Digital Magazine di maart, Egbert Leest ta conta di e temanan hopi emocional cu ta bolbe den su mosaiknan y tocante e historia tras di e mosaik di e Escudo di Zwaan, cu ta representa e tradicion y historia di Famia Ellis di Papiamento Restaurant. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
