E filosofia creativo di Latoya Natalie Mcleary ta pa semper keda autentico cu un vision y punto di bista cla. Den esencia e ta un contado di storia a traves di su trabou como diseñador cual e kier pa ta significante, inspirativo y impactante. Creciendo na Jamaica tur cos rond di Latoya a forma su sentido di moda. Loke inspir’e pa lansa Hautelife World Eyewear tabata su amor pa bril di solo, moda y biaha. E paisnan cu el a bishita durante añanan a inspira cada coleccion, cu ta draai rond di estilo di bida y no solamente bril.
Pa Latoya Mcleary no tabatin un experencia particular como Jamaiquino cu a forma su amor pa moda y diseño. E tabata nan cultura, e hendenan, e amor y aprecio natural pa moda. E tabata encanta wak e ‘mesh marina tops’, e rand rondo di e brilnan di solo chikito popular na Jamaica na cuminsamento di añanan 90, cu a inspira un di su coleccionnan di bril yama ‘Yaadie Collection’. El a compronde for di jong cu nan ta naci cu e habilidad pa ta fashionista y trendsetter na Jamaica.
Latoya Mcleary ta co-fundado di Jamaica Fashion Council y nan vision no ta pa crea un plataforma pa creativonan Jamaiquino so, pero pa henter Caribe. Tin hopi hende talentoso na Jamaica y Caribe sin recurso. E cambio mas grandi cu nan ta desea pa logra ta cambia e manera cu moda ta wordo haci for di e banda di negoshi. E mester di un sistema defini y structura pa e por atrae inversionistanan y partnernan pa Caribe. E aña aki ta prome biaha cu nan lo presenta Jamaica Fashion Week 2026 pa asina presenta nan propio siman di moda.
Latoya Mcleary a participa na Aruba Fashion Week 2025 cu a duna e diseñadornan incluyendo e mes un oportunidad pa mustra nan trabou no solamente na e publico di Aruba pero tambe internacionalmente. El a siña di hopi diseñador Caribense talentoso a traves di AFW y ta bisa cu esaki ta loke nos mester den Caribe. Latoya Mcleary ta ilustra e portada di april y ta elabora mas di su experiencia na Aruba den Focus Digital Magazine, cu ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
