Aruba ta sigui fortalece su red di conectividad aereo regional cu e anuncio di un ruta di temporada nobo opera pa Wingo, cu lo conecta Aruba directamente cu Barranquilla, Colombia, a traves di Aeropuerto Internacional Ernesto Cortissoz. E conexion directo nobo lo permiti e residentenan di Aruba y e bishitantenan Colombiano haya acceso na mas opcion di biahe, experiencianan turistico y bienestar.
E ruta lo cuminsa opera dia 9 di juli y lo ta disponibel temporalmente durante temporada halto cu dos vuelo semanal riba diahuebs y diadomingo. E conexion nobo aki ta amplia e opcionnan di biahe pa e residentenan di Aruba y ta facilita e yegada di bishitantenan for di Colombia, ofreciendo oportunidadnan turistico como comercial.
“Wingo ta fortalece e conectividad entre Aruba y Colombia, beneficiando tanto nos localnan como tambe e bishitantenan internacional. E apertura di e ruta di temporada aki entre Barranquilla y Aruba ta reenforsa e strategia di Aruba Tourism Authority (A.T.A.), cu ta busca pa beneficia e comunidad di Aruba door di brinda e opcionnan di biahe y conexion den e region, mientras tambe ta promove e diversificacion di e mercado primario na Latino America”, asina Ronella Croes, CEO di A.T.A. a expresa.
“E lansamento di e servicio di temporada nobo aki entre Barranquila y Aruba ta representa un paso importante pa fortalece nos conectividad regional y amplia acceso na nos isla. Na Aruba Airport Authority N.V. (AAA), nos ta keda comprometi pa traha estrechamente cu nos partnernan di aerolinea pa crea oportunidadnan nobo cu ta beneficia nos comunidad, stimula crecemento economico y mehora e experiencia di biahe en general pa nos pasaheronan. Nos ta contento di por yama bonbini na e expansion continuo di Wingo y ta ansioso pa e impacto positivo cu e ruta aki lo aporta pa ambos mercado”, tabata expresion di Jonny Andersen, CEO di AAA.
Cu e ruta nobo aki, Aruba ta refirma su compromiso pa ofrece experiencianan unico, accesibel y responsabel, impulsando su posicion como un destinacion cu ta combina bienestar, cultura y turismo di calidad pa tur su bishitantenan.
