Nos ta haci regimen di alimento pa ta mas flaco of pa no bira gordo y nos ta bay gym pa no perde e silueta. Sinembargo nos no ta preocupa di un musculo asina vital manera e celebro. Bo tabata sa cu ta existi ‘e dieta di celebro’ y cu ta di sumo importancia pa bo inclui e alimentonan aki den bo cumindanan y menu diario… bo lo cuminsa nota cambio y resultado den poco tempo.
AWA
Ta realmente indispensabel y bo por consumi infusion sin sucu, juice natural, fruta manera appelsina of batido casero. 91% di nos celebro ta componi pa awa, bo por pasa 2 luna sin come, pero no mas di 2 siman sin bebe awa.
BROCOLI
Un di e “super berduranan” cu no por falta den nos dieta. Band’i e berdura aki ta conseha pa consumi kool, cauliflower y Brussel kool. Nan ta contene hopi proteina, poco caloria, hopi awa y vitamina (A, B, C, E y K). Ademas, ta aporta acido folico, flavonoides y luteina. Ta excelente pa evita e perdida di memoria. Preferibel consumi brocoli steam of hasa pa evita cu ta elimina e vitamina C.
AVENA
Por consumi e cereal aki cu juice di appelsina, cu lechi of yogurt. E tin un gran cantidad di proteina y aminoacido, como tambe vet no satura, vitamina B y E, magnesio, potasio y selenio. Ta hopi nutritivo y tin un accion positivo riba e memoria. Un copi di lechi cayente cu 2 cuchara di avena cushina, endulza cu honing, perfecto pa bebe prome cu bay drumi.
BACOBA
Ta bisa cu e ta fruta di e sabionan, pasobra esunnan mas inteligente di India tabata consumie. E tin sucu positivo, vitamina B y C, calcio, fosforo, potasio y magnesio. Ta conseha pa come ora e ta hecho, di color geel scur of maron, pasobra e sucu ta absorbe facilmente y ta bay directo na e celebro. E ta interveni den e produccion di neurotransmisor cu ta encarga di e memoria y e bon humor.
TE BERDE
E tin hopi propiedad e infusion maraviyoso aki originalmente di Oriente. No ta fermenta, tin hopi antioxidante, manganeso, acido oxalico, etc. E ta impidi e desaroyo di tumor, ta depurativo y ta protega e funcionnan cerebral. Ademas ta sirbi pa adelgaza y kima vet.
