Putts for Paws Charity Golf Event cu a tuma luga dia 18 di december na The Links na Divi Aruba tabata un tremendo exito, beneficiando Aruba Animal Shelter. Un amante di animal, Tito Beveridge di Tito’s Handmade Vodka, basa na Texas, tin basta aña caba ta patronisa e evento aki den colaboracion cu Divi Resorts, The Links na Divi Resorts y Divino Aruba.
E aña aki, e beneficiario escogi tabata Aruba Animal Shelter, cu ta rescatando, ‘sheltering’ y cuidando Aruba su cacho- y pushinan neglisha pa 30 aña caba riba nos isla. E iniciativa aki di recaudacion di fondo ta exactamente locual Aruba Animal Shelter tabatin mester na e momentonan aki, mirando con Covid a pone un paro na nan actividadnan di recauda fondo e ultimo dos añanan aki, tambe despues di final di e programa ‘Stimami Sterilisami’ cu a caba algun luna atras.
Locual a resalta mas di e evento tabata adoptacion di dos puppies, nan yama Tito y Divi, tambe otro shelter pup a wordo adopta. E team di Aruba Animal Shelter kier extende un danki na tur e patronisado- y sostenedonan kende a haci e evento aki posibel. E organisacion simplemente no por a sigui carga e trabao sin tur e apoyo y sosten aki cu a wordo brinda. Si bo tambe lo kier sostene e shelter, por fabor bishita www.arubaanimalshelter.com of scan e QR Code abao pa haci bo donacion.
