Darren Hardy su mayornan a divorcia tempo cu e tabatin apenas 18 luna. Su mama no tabata kier a keda cu ne y su tata a encarga pa tuma su criansa na su encargo. E no a lanta Darren cu hopi regla of restriccion, sinembargo nunca el droga y tampoco hinca su mes den problema y tabata haya bon cifra na scol. Loke su tata a dune tabata un filosofia, un standard pa biba riba un nivel. Ora e tabata keha cu algo no tabata husto of tabata pensa cu e no tabata suficientemente bon, su tata tabata bise cu e circunstancianan no ta importa. Si otronan ta mas inteligente, tin mas talento of cu mas experencia, toch ainda bo por gana. Traha mas duro, studia mas ora y push bo mes pa bay unda niun otro hende lo bay: “Be The Exception”.
El a lage kere cu e por haci cualkier cos y logra loke e kier, si simplemente e dicidi pa ta e excepcion. E filosofia aki a guia Darren Hardy pa cuminsa su propio empresa cu 18 aña. Prome cu el a cumpli 19 aña, e tabatin un ingreso di seis cifra. Den 5 aña el crece cu mas di un miyon di dollar pa aña. Trienta aña despues, e ta sigui ser ainda como su fuerte guia. Despues di entrevista, profila y conoce e personanan mas exitoso rond mundo, e unico cos cu e sa cu siguridad ta, cu exito y logra ser extraordinario ta posibel ora bo scoge pa: ‘Ser e Excepcion’.
Cada un di nos a ricibi capacidadnan extraordinario y nos tur ta aki pa un motibo, pa cumpli cu un proposito special. Tin un bos den bo interior cu sa esaki. E ta sclama esaki na bo y ta yama bo pa sali di e manada di complacencia promedio y pa bay den bo gran aventura, pa desafia bo donnan y wak tur loke bo por haci cu tur loke bo a haya. Ser e Excepcion ta rekeri cu bo tin cu haci un escogencia: “Go along or go beyond”. Conforma cu e suficientemente bon of haci un esfuerso pa mehora. Bo no por ta normal si bo ta desea pa logra resultadonan abnormal. Si bo ta desea biba, stima y lidera manera otronan no lo haci, bo mester haci loke e otronan no ta haci. Bo mester siña mas, crece mas, inverti mas y ser mas cu esunnan cu ta rond di bo. Bo por scoge bo miho futuro. Bo por biba e bida cu bo ta destina pa biba, pa esunnan cu bo ta stima biba y pa esunnan cu bo ta destina pa influencia.
Darren Hardy ta un di e oradornan mas distingui mundialmente. El a ricibi e reconocimento como ‘Master of Influence by the National Speakers Association (NSA)’, otorga na e oradornan cu tabatin un impacto global significativo a traves di e profesion di ‘keynote speaking’. Esaki ta un honor comparti pa solamente 22 otro luminario den e historia di e industria, incluyendo Jim Rohn, Og Mandino, Brian Tracy, Zig Ziglar y Deepak Chopra. Darren ta cautiva audiencia chikito di 50 te na stadionnan cu mas di 20.000 hende. Su presencia dominante y su estilo atractivo combina cu su contenido di gran balor, a dune e posicion cu e tin awendia. E ta motiva, inspira y prepara e miembronan di e audiencia pa crea un exito duradero y sostenibel.
