E cantante britanico tabata un di e artistanan cu a ser perhudica fuertemente door di e pandemia global, cu a haci cu e mester a suspende su gira di despedida. E pandemia a afecta e economia mundial, desde e empresarionan chikito cu a perde añanan di esfuerso y trabou te na e celebridadnan, cu a pone un pauze na nan proyecto- y giranan pa causa di lockdown y distanciamento social. Un cantidad grandi di cantante di tur pais mester a cancela nan concierto- y actuacionnan, perdiendo asina miyones di placa. Un di nan ta Elton John, cu tabata preparando su gira di despedida y el a mira con tur su plannan a bin abou ocasionando hopi placa di perdida.
E artista a anuncia cu esaki lo ta su ultimo gira cu e lo haci den su bida, pasobra e kier enfoca mas na su yiunan y famia, pero e pandemia COVID-19 a strobe cu e por logra realisa esaki. E consecuencia di esaki tabata cu e cantante a perde un cantidad grandi di placa. Segun The Mail e cantidad ta yega den careda di 60 miyon euro, cu e artista y su casa, David Furnish, a perde door di e coronavirus crisis.
Un gesto di e cantante cu a pone haya tur tipo di elogio ta, cu el a dicidi pa paga di su propio fondo sin e apoyo di gobierno, e salario di su empleadononan. Esaki a pone cu el a bira un ehempel na su pais pa e otro artistanan, cu apesar di tin fortuna inmenso, a dicidi pa probecha e ayudo di gobierno. Te ainda no tin niun claridad ki tempo Elton John por realisa su gira di despedida, ya cu pa loke ta concierto y otro eventonan cultural, ta e ultimo actividadnan cu por bolbe na normalidad.
