Jennifer Lopez y Alex Rodriguez a tuma e decision finalmente pa separa, supuestamente door di e scandal cu e strea di e reality show ‘Southern Charm’ Madison LeCroy y e ex-Yankee. Na januari, Twitter a cende na candela cu e speculacionnan di e acusacionnan ‘candente’ di infidelidad cu tabata involucra un ‘ex-MLB star’ y Madison LeCroy. Despues LeCroy a revela cu e tabata papiando via FaceTime cu Rodriguez, pero el a insisti cu nan no a conoce otro den persona. Cu nunca el a gaña fisicamente su prometida cu ne, y no kier nada malo pa su famia ni pa di dje, y definitivamente nan ta inocente di esaki, ta locual Madison LeCroy a declara na Page Six na februari.
Desde algun siman tabata core rumor fuerte di crisis den e relacion di Jennifer Lopez y Alex Rodriguez. Ayera portalnan confiabel manera Page Six y Tmz a reporta cu e pareha a separa. E separacion a pasa memey di e rumornan di infidelidad y un boda cu a keda pospone na dos ocasion. Aunke no ta hopi cla loke a causa e separacion, ta bisa cu e decision a wordo tuma ayera mes, y mesun mainta A-Rod a publica un potret riba su Instagram riba un yate na Miami y el a scirbi: “Don’t mind me, just taking a sail-fie. What are your plans for the weekend?”.
E Diva di Bronx a publica tambe riba su Instagram un imagen cu a crea sospecha, momento cu el a post un shot di un video call cu su ex Marc Anthony y su yiu Emme, unda e ta sali yorando y cu e caption: “Cu ora nan ta tristo momma y daddy t’ey”. Ta bon conoci e excelente relacion entre e yiunan di Jennifer, Max y Emme, y e yiunan di Alex, Natasha and Ella, di su matrimonio cu Cynthia Scurtis.
JLo y Rod a comprometi na 2019, sinembargo cu e yegada di Covid nan plannan pa casa a bin abou y na final di 2020 a circula e version cu nan ta considerando pa cancela nan boda. Durante un entrevista un par di luna pasa, Jennifer a bisa cu teniendo na cuenta nan edad y e hecho cu ambos ya tabata casa antes, no tabata algo imprescindibel ni urgente. E ta algo hopi personal cu nan mester comparti como pareha, y mester pensa riba loke di berdad bo kier haci.
