E decision di cambia di puesto y habri un hotel den pandemia tabata un decision hopi grandi, y den bista di algun hende esaki tabata un ‘locura’, mirando e situacion mundial y incertidumbre. E movecion aki ta algo cu Shareska Gutierrez ta hopi orguyoso di a haci, y mas ainda como un local. Radisson Blu Aruba a habri como e prome hotel na Aruba cu un ekipo ehecutivo completamente local – di nan GM te cu cada un Director y Manager. Shareska ta bisa cu nan kier mustra cu nos localnan por maneha un hotel, y tambe motiva e generacion cu ta sigui.
Su siman laboral den e puesto di ‘Director of Sales and Marketing’ cada dia y siman por ta completamente diferente. E ta splica den su entrevista cu e mester ta hopi flexibel y por adapta. Riba e pregunta si e ta un persona mas creativo of analitico, e ta contesta afirmativamente cu ‘ambos’, cu tur dia e mester evalua e strategianan, mira e numbernan – tur cos for di e cifranan actual te cu evalua e numbernan di e siguiente añanan. Di otro banda marketing y PR ta rekeri hopi mas creatividad, bin cu e ideanan y concepto nobo, y haci e cosnan diferente, locual Shareska ta encanta.
Por lesa full e entrevista cu Shareska Gutierrez den FOCUS Digital Magazine di augustus, cu ta accesibel ‘gratis’ via Apple Store of Android Google Play Store, cu por download e aplicacion riba un smartphone of tablet.
