E pandemia di Covid-19 a cambia e bida di mayoria hende den un forma of otro. Hopi ta esunnan cu a dicidi pa no laga nan salud y fisico bay atras, y esaki a inspira nan pa haci un rutina di workout. A pasa mas cu un aña desde e pandemia y esaki a trece algun tendencia nobo y interesante di fitness den 2021.
Online Training
E tipo di ehercicio aki ta trece un experencia unico, unda bo ta den e comodidad di bo mesun cas. Bo por wak e lesnan ‘live’ of tambe por wak nan graba. E trend di training online a subi drasticamente door cu durante e pandemia hopi di nos a keda na cas sin acceso na gym.
‘Wearable technology’
E fitness trend aki ta inclui e aparatonan electronico cu e hendenan por bisti manera: Fitbits y smartwatch, cu ta diseña pa colecta data di e persona su salud y ehercicio. E acesorionan aki ta midi bo ‘heart rate’, e cantidad di paso cu bo ta tuma den un dia y e calorianan cu bo ta kima durante e dia.
E actividadnan pafo
Esaki ta wordo categorisa como e hendenan cu ta haci actividad den aire liber, por ehempel canando cu un grupo di hende na Watty Vos Boulevard of Linear Park, core bicicleta, y hiking. Esaki a bira hopi popular den e comienso di 2021 door cu durante e pandemia toch bo por ta social mientras bo ta mantene e protocolnan di distanciamento social.
Training cu bo mesun peso di curpa
Pa esunnan cu kier haci ehercicio sin gasta mucho placa, ‘bodyweight training’ ta un opcion fantastico. Bo mester poco ekipo paso bo ta uzando bo mesun curpa. E ehempelnan di ehercicio di ‘bodyweight’ ta: planks, push-ups, burpees, mountain climbers y squats. E ehercicionan aki ta uza e peso di bo curpa manera resistencia (en bes di uza un peso of resistance bands).
Apps di ehercicio riba ‘smartphone’
E apps aki ta creciendo den popularidad. E contenido ta inclui audio y video cu ta guia bo durante bo ehercicio y ta yuda bo midi bo progreso. Tin un variedad di apps cu ta ofrece diferente sorto di ehercicio manera; yoga, coremento y nutricion.
