Hopi biaha nos ta scucha e frase: ‘pa bo perde peso bo mester come poco caloria! Move mas y come menos’. Esey ta berdad, pero e no ta duna bo mucho informacion pa con abo por aplica esaki den bo bida diario. Den e articulo aki nos ta duna 3 TIP pa yuda reduci e calorianan si esey ta bo meta.
BEBIDA CU CALORIA
E calorianan di bebida por ta cualkier cos manera: coca cola, lechi, awa di coco of alcohol. E manera mas facil pa reduci e cantidad di caloria cu bo ta come ta pa ‘tackle’ esaki. Por ehempel, si bo ta bebe dos coca cola pa dia, esey lo ta alrededor di 300 caloria, si bo cambi’e pa un coke zero of diet coke, bo ta spaar 300 caloria! Y e parti mas great ta, cu bo no ta restringi bo mes, paso toch bo ta disfrutando di bo soft drink faborito. Bo por baha peso sin ta comiendo menos of bebiendo menos, bo a simplemente swap e bebida pa un opcion di caloria mas abou. Si bo ta un persona cu gusta bebe lechi full fat, por cambia esaki pa skim milk of pa lechi di almendra cu ta menos caloria.
AZETA
Un cuchara grandi di azeta di olijfi ta aproximadamente 120 caloria. Ban bisa, bo ta uza un cuchara grandi di azeta ora bo cushina webo, steak, galiña y vegetal, esaki ta facilmente aumenta e calorianan den bo cuminda. Tin 3 opcion pa modera esaki, bo por reduci e porcion di e azeta, enbes di un cuchara grandi bo ta uza mitar cuchara pa cushina, cu lo ta 60 caloria enbes di 120. Dus awo enbes di tin 300+ caloria di azeta den bo dia, e ta 150. Di dos opcion ta cu bo por uza e ‘low calorie sprays’ cu ta menos azeta total compara cu un cuchara grandi. E di tres opcion ta cu bo por busca manera pa no uza azeta pa cushina, por ehempel bo por cushina bo cuminda den pressure cooker, oven, airfryer of riba grill y bo no mester azeta pa cushina.
PROTEINA
Proteina ta e nutriente cu lo yena bo mas lihe y laga bo sinti satisfecho pa un tempo mas largo. Lo ta ideal pa incorpora proteina den mayoria di bo cumindanan, y si bo por den bo snacks tambe. Ora bo agrega e nutriente aki den bo platonan, e lo yuda bo keda yen y bo lo tin menos hamber, y si bo tin menos hamber bo ta come menos caloria. Tambe door cu bo ta yen, e lo por disminui e gana di come sucu, paso tin biaha nos tin hamber, pero nos ta opta bay pa un snack cu ta ongezond of cu tin poco nutriente, cu lo yuda nos keda yen.
